Дагъусттаннал бакIчи Сергей Меликовлул тапшур бувну, ноябрьданул 24-нний ванал маслихIатчи Саэд Маматханов, спортрал министр Сажид Сажидов, Аьрасатнал президентнал Дагъус­ттаннал Постпреднал хъунаманал хъиривчу ХIажимурад Къажлаев, вара Постпредствалул Жяматий­сса советрал члентал, «Дагъусттан» МЦК-лул вице-президент, профе­ссор Астемир Шайхаьлиев ва «Да­гъусттан» МЦК-лул президиумрал член, Мариян Илиясовал цIанийсса «Дараччи» фондрал Москавливмур филиалданул вакил Басират Билалова бивунни Дагъусттаннаясса, бусалалувун агьсса, Запорожскаллал фронтрай шанна нюжмардий цувалу кьянкьану авцIуну ивкIсса сапер-разведчик Закаръя Аьлиев хъин хъанахъисса госпитальданийн.

Закаръянал бувсунни вайннахь цува къулай хъанай ушиву, госпитальданий дагьайкунсса аякьа душиву. Сергей Меликовлул цIанияту ва хъин хъанахъисса отделениялийминнайх бавчIунни ссайгъатру, бахшишру.

– Жу ччя-ччяни госпитальлай хъин хъанахъиминначIан биянсса хIарачат бувару, миллатру личIи бакъа, вайннал дакIру ххари данмуних бикIару. Ялунгума, госпитальданул хъуниминнахь цIувххуну, ялун бучIанми бакъаминнахгу къулагъас дуванмур бувару, жулваминная личIи къабан. Хъунисса хъиншивуртту цанна дурсса кунна, бусрав-барчаллагьрай бикIай. Лахьхьугу бивру «Дараччилул» хъунмур Гульшан Хасаевал тапшур бувну, азарханалий хъин хъанахъисса жагьилначIан коляска диян дуван. ХIакьину тIурча, Закаръянал жу хIайран бунну. Талатавуртту къизгъинний циксса ккаккарчагу, уттигу азарханалий хъин хъанай унувагу, ванал симандалия пиш чан къавхьунни. Кьуния мяйра шинал оьрмулувусса, някIсса яру, кIяласса бурчу, цувагу авурсса жагьил ур, шанна нюжмардий чимус канай, хIачIиялул кIанттайгу водородрал перекись хIачIлай, яхI буллай ивкIсса ванал чурххай къия къархьуну дикIайссияв. Амма ванал яхI бушиву, чувшиву пиш тIутIаврийну ларитан шайсса дакъая. Укунсса вирттаврай дарцIуну дур хIакьину дуниял! – увкунни Басират Билаловал.

ПатIимат Рамазанова