Аьрасатнал Федерациялул Экономикалул лябуккулул министерствалул баян буллай бур 2025 шинал Щалагу Аьрасатнал «Вершина» тIисса кIилчинмур инвестициярттал премия ласавривух гьуртту шаврил хIакъиравусса заявкартту кьамул дуллалишиву.

Лауреатътуран наградартту дулунтIиссар майрал 25-27-нний «Минводы Экспо» МВЦ-лий хьунтIисса Ккавкказуллал инвестициярттал форумрай. Ванил сакиншинначи хьуну бур «Росконгрессрал фонд», ваницIун кабакьлай бур АьФ-лул Экономикалул лябуккулул министерствалул.

Конкурсравух гьуртту хьун бюхъантIий бур Аьрасатнал законнацIун бавкьуну зузи­сса билаятрал инсантуращагу, юридий идарарттащагу. Гьуртту хьуншиврул кьамул дуллалиссар 2022 шиная 2025 шинайннин бартдиргьусса проектру, ми цирдагу дикIан аьркинссар цIушиннардугу, хьхьичIунсса технологиярттугу ишла дурсса, Аьрасатнал регионнай экономикалул ва социал иширттал лябуккулун тамансса мюнпат хьун бувсса.

Язи дугьаву хьунтIиссар цаппара ятIапирттай: заявкартту батIул дантIиссар экспертрал комиссиялул, ххув хьуми личIи бувантIиссар билаятрал хъуни­сса компаниярттал бакIчитал ва исполнитель властьрал федерал органнал каялувчитал бувхсса жюрилул.
Номинациярттал, язи бугьаврил критериярттал, заявкартту дулаврил ва сияхIрайн ласаврил кьяйдардал хIакъираву гьартану кIул буван бюхъантIиссар Ккавкказуллал инвестициярттал форумрал «Премия» тIисса бутIуву.

Форумран хасъсса цIу­сса ха­вардащал кIул хьун бюхъан­тIиссар Ккавкказуллал инвестициярттал официал сайтрай: forumkavkaz.org, социал сетирдай: «Телеграм» ва ­«ВКонта­кте».

ХIасан Аьдилов