Цаппара хIаллай къашавайгу бивкIун, мубараксса ва ЗанначIан гъансса аьрапалул зуруй, оьрмулул 92 шинаву аьпалухьхьун лавгунни Хъурхърал шяравасса ххаллилсса хъамитайпа, буттал шяраваллил жяматрал дянив кьадру-кьиматрайсса инсан, Кьадинал душ Аьлиханова Сяърижат-хIажи.
Сяърижат бувну бур 1933 шинал Кьадинал ва Бикаханнул кулпатраву.
Буттал шяраву школагу къуртал бувну, чIунархIал душваращал зун байбивхьуну бур Ждановлул цIанийсса Хъурхърал колхозраву, та чIумал сийлийсса чIаважагьилтурал бригадалуву.
Нину-ппу кунма, даву нахIусса, зирангсса душ звеньевойну бувчIуну бур. Гьантта най, ташулул чIунгу дирну дур. Сяърижатлул мурадирал ташу хьуну бур ххаллилсса тухумрал арс Аьлиханов Аьбдулкьадирдущал.Вайннал дянив хьуну бур мукьва оьрчI – кIия арс, кIива душ.
Гьарца ххуллу-ххуттаву оьвхъусса, авкьусса цила ласнащал архIал оьрчIругу лайкьну тарбия бувну, дуккингу бувну, ташулулгу щаллу бувну, МахIачкъалалив бивзун бивкIссар.
Сяърижат бия дакI-аьмал авадансса, цинявннащал хIал бавкьусса инсан, цила оьрчIангу, оьрчIал оьрчIангу иминсса нину ва аькьилсса амудада. Бусайсса мукъуйгу цIу бусса инсан бия.
Сяърижатлул лас Аьбдулкьадир ччяни дунияллия лавгуна, аьпа биву. Хъуни хьусса, цала-цала къатрал хьусса оьрчIал ниттихасса хIурмат-иззатгу хъинну лавайсса буссия. КIийлва хIажлийн лавгун махъ ванил укуннагу бусравсса цIанил ялун ххи хьуссия «хIажи» тIисса уздансса титулгу.
Сяърижат-хIажинал чIявусса бивкIурдай авурну, дакIнин бюхханну зикрирдугу бишайссия, бивкIу-буккулул заллухъру цихава зукьлакьи байссия.
Махъсса шинал Сяърижат-хIажи шануцIух хьуна. Бусравну оьрмугу бувтун, бусравну дунияллиягу лавгунни ххишала бакъа ххаллилсса зунттал хъамитайпа.
Сяърижат аьпалухьхьун лагаврил дард-хажалатгу кIидачIлай, дакIнийхтунусса жижара буллай буру ванил арсваврахь Сурхайхь, Тамерланнухь, душнихь Гуржагьрахь, куявнахь Валерахь, тачIав дакIния къабуккайсса, жуятува лавгсса душнил Зумрутлул арснахь Таймуразлухь, душнихь Лаурахь ва махъсса цинявппагу мачча-гъаннахь, агьлу-авладрахь.
Узданну дин-иман дуручлай оьрму бувтсса Сяърижат-хIажи имандалий лавгун лякъиннав, цил рухI рахIатний паракьат хьуннав.
Хъурхърал шяраваллил цIания Гуржигьан Къараева
