Учительнал пишалул кьини КIамахъаллал шяравасса МахIаммадлул душ ПатIимат Айгунован дуллунни «Аьрасатнал лайкь хьусса учитель» тIисса бусравсса цIа. Хъунмур оьрму ванил хас бувну бур оьрчIру тарбия баврил ва миннан кIулшивуртту дулаврил ххуллий.

ПатIимат МахIаммадовна Бабаюртуллал райондалийсса Сангардал школалий лакку мазрал дарсру дихьлай буссар, дуклаки оьрчIаву мазрахссагу, миллатрахссагу, ватандалухссагу ччаву чантI учин дуллай. Ванил хIурмат хъунмасса бур Сангардал школалул коллективралгу, оьрчIал ва нитти-бутталгу дянив.
Гьай-гьай, бигьасса бакъар кIулшивурттал гьану бизаврил ххуллий буллалисса захIмат. ДакIнийхтуну цила пиша ххирасса, оьрчIах ччаву дусса, хIакьсса педагогнащар бюхъайсса, бигьа бакъасса учительнал пишагу язи бувгьуну, чIярусса шиннардий му ххуллийх бачин.
ХIурмат бусса ПатIимат!
Барча дуллай буру ина вила захIматрайну хIалал дурсса награда. ЦIуллушиву дулуннав, дуллалимуниву тIайлабацIу хьуннав, дуклаки оьрчIалгу, вилами оьрчIалгу ххари буллай битаннав. ТачIав къалещаннав виву зунсса гъирагу, шавкьгу.