Гьарун Саэдовлул цIанийсса Ккуллал шяраваллил колхоз 1950-ку шиннардий лахъан дурну диркIссар СССР-данул ВДНХ-лул ХIурматрал улттуйн, хIакьинусса кьинигу тиккура дуссар.
2002-ку шинал колхозру лиян дурну, миннун кIанай СПК-рду, агрофирмарду, племхозру дурну диркIссар. Ккуллал шяравугу сакин дуруна лухIи ризкьилул жинсирдал хозяйство (племенное хозяйство) «Кулинский». Цаппара шиннардива му хозяйствалул председательну ивтуна ХIамидлул арс Чупалав Кьурбанов. Яла ванал сакин дуруна яттилмур жинсирдал хозяйство.
ЦIанасса ппурттуву ва хозяйство лавайсса даражалий дачин дурну ур Чупалав. Ятту ссуттил лагай Бакресуллал кIинтнил даэлийн, интту бучIай зунттавунмай. ХIухчалтгу рязину бур хозяйствалул иширттая. «Омарова-Чохского» тIисса яруссаннал колхозраву зоотехниктурал Близниченкол ва Пакаевлул буккан бувну бивкIссар цIусса яттил жинс «Дагестанская горная». Му жинсирал ятту бия та чIумал чIяруми колхозирттаву. ЦIанасса ппурттуву му жинсирал ятту цаппара хозяйстварттаву бакъа ливчIун бакъар. Ккуллал жинсирдал хозяйствалулгу яттия ласлай бур ппал, накI, дикI. Амма ппалул багьа ливчIун бакъар. Ларгсса шинал 1 хIайван букьанну дуллай бия 160 къуруш, муния ласлай бия 3-3,5 кило ппалул. Ппал ласайма акъар, заллухъруннал ми экьидичлай бур, ягу ччучлай бур. Нажагьссаннал ласурча –1 кило 5 къурушран ласлай бур.
Ккуллал колхозраву жинсирал ятту яхьуну бур 2 къушлий, миннул удаманталну бур Мямма ва ХIажикьурбан.
Гьашину майрал 18-нний Мяммаев Мямман дуллунни ХIукуматрал награда – Аьрасатнал Шяраваллил хозяйствалул министерствалул Барчаллагьрал чагъар. 23 шинал мутталий хIухчуну зий ва хъанай дур Мямман хIукуматрал дуллусса цалчинсса награда. Мяммаев бакIчисса яттикъушлий зий бур мукунма ванал уссу Ризван, кулпат Ульяна ва цаймигу мачча-гъанми.
Мямман чIа тIий ура цIуллушиву ва давриву хьхьичIуннайшиву.
Барчаллагь тIий ура наградалун райондалия Мямма ккаккан увминнахь ва ванал давурттан лайкьсса кьимат бивщуминнахь.
МахIмуд Аьлилов
