Декабрь зурул 6-нний Гьунар бусса оьрчIансса республикалул чIяру профиллу дусса лицей-интернатрай (РМЛИ ДОД) хьунни кIира агьамсса мероприятие. VII Республикалул гуманитар конференция (цайми регионнугу гьуртту хьусса) ва «Защитники Отечества» тIисса Дагъусттаннал тарихрал ва обществознаниялул учительтурал республикалул IX научно-методический слет. Пленарное заседаниялий гьуртту хьунни хьхьичIунсса учительтал, аьлимтал ва жагьилсса пишакартал.

Конференция тIитIлай, гьурттучитал барча бунни Лицей-интернатрал директор, Дагъусттаннал лайкь хьусса кIулшивуртту дулаврил зузазала Альбина Шутуновал. Ялун нанисса ник Ватан ххирану тарбия давриясса, дарсру дишаврил ттизаманнул кьяйдардаясса, кIулшивуртту дулаврил сфералуву инновациялул технологияртту ишла давриясса ва учительнал даврин лавайсса кьимат бишлашисса ихтилатру бунни Дагъусттаннал Педагогтурал ассоциациялул председатель, Республикалул кIулшивуртту дулаври л центрданул (РЦО) директор Анжела Байрамбековал, ДИРО-лул проректор, тарихрал элмурдал доктор АхIмад Кьурбановлул, МахIачкъалаллал КIулшивуртту дулаврил управлениялул хъунмур Шаганэ Баймурзаевал, «Альтаир» тIисса Гьунарду итххяххан байсса центрданул директор Аймисай Дибировал, Щалагу Аьрасатнал Юстициялул университетрал Ухссавнил Ккавкказуллал институтрал юридический клиникалул директор, Лицей-интернатрал выпускник Раджаб Хасбулатовлул, Дагъусттаннал педуниверситетрал тарихрал кафедралул профессор, тарихрал элмурдал доктор Роза МахIаммадовал, лавайсса категориялул тарихрал учитель Гулизат Мурадхановал, ­Авгъан дяъвилул гьурттучи Мухтар МахIаммадаьлиевлул ва м.ц. Мероприятие хьунни опыт ва кIулшивуртту кIидачIинсса ххаллилсса площадкану.
Лицей-интернатрал дуклаки оьрчIал бувккунни шеърирду, увкунни балайрду.
Ихтилатру къуртал ­хьуну махъ конференциялул гьурттучитуран буллунни КIулшивуртту дулаврил министерствалул ва Лицей-интернатрал чулухасса барчаллагьрал чагъарду. Мукунна наградартту дуллунни Авгъан дяъвилул ва СВО-лул гьурттучитуран, волонтертуран.