Тележурналист, Аьрасатнал культуралул лайкь хьусса зузала, Дагъусттаннал телевидение ва культура хьхьичIуннай ва ларай шавриву хъунмасса бутIа бивхьусса Ссалам Хавчаев цимилагу хьуссар «Илчилул» редакциялий.

Кказит итабакьлай байбивхьусса шиннардий жучIа ччя-ччяни шайва лакраву махъ нанисса, миллатран хъинбалартту буван ччисса арсру-душру гьур­ттусса батIавуртту.
Миннаву ца яла чялишма ва ябацIанма ия Ссалам Хавчаев. Ванан республикалий кIукъакIулсса инсан къаикIайва. Цувагу мудан пар-партIий, исвагьину ларххун икIайва. Сайки мудан къищуну костюмраву, галстукгу бавхIуну. Яла-яла, жун, дахьва журналистикалул ххуллийн бувкминнан, ххуй бизайва ва, цIанихсса журналист, Дагъусттаннал телевидениялул гьану бивзминнавасса ца ттарцI, республикалул кьатIувгу ххуйну кIулсса каялувчи, жущала гъирарай гъалгъа тIутIаву. Цахъисрагу дакI хъуншиву къадурну. Ванал хасиятирттаву ца яла ххуймур дия, ягу дунни оьрмулухун ва хасият: инсаннал хIурмат бушиву.

ХIухчищалгу, хIакимнащалгу ца даражалий хIурматрай гъалгъа буваву. Цумур передачалий тамаша буварчагу, цумур интервьюрах вичIи диширчагу, итталун къабагьну къаличIай Ссалам Хавчаевлун цала хьхьичI щяивкIманаву хьхьичIа-хьхьичI инсан, личность чIалай ушиву. Асар къавхьуну къаличIай га инсаннал чулинмайсса хIурмат, ганал буруккинттах ва ххаришивурттах хIурматрайсса ургаву. Га цана гъансса, маччасса куна, гъилину, дакI цIуцIаврий буллалисса гъалгъа. Вана вари эфирдания яру батIин къашай­сса бусравшиву. Журналистнал цала кьадру-кьимат буруччаврил хIакъи-хIисав.

ЛичIиссава ва муданма­сса бия ванал ветерантураха­сса, фронтовиктурахасса хIурмат. МахIачкъалаливсса ва лагма-ялттусса шагьрурдайсса сайки циняв фронтовиктал кIула учирчагу къабяйкьинссара. ДакI цIуцIаврийсса аякьа дусса унутIий, бусравну ва ххирану ия оьрмулул бугьараминнангу. Вагу инсаннал мяърипатрал ца яргсса лишанни.
Ссалам Хавчаев чан-кьан­нувагу кIулсса инсан акьин­тIиссар, ва интеллект лахъсса, культуралул гьану цIакьсса, кIулшивурттал майдан гьарта­сса профессионал, лавайсса даражалул журналист ур учаврицIун. Энциклопедиялул кIулшивуртту дусса, ччимур тема усттарну ттирикIинну, аькьлу камил­сса, кIулшивуртту куртIсса ччима аьлимчунащал, хъунасса политикнащал сивсуну гъалгъа бувайсса. Гьанулун ласунсса цIакьсса хIуччарду хьхьичIун бугьлай, бястлийсса ихтилатравугу гьарца чулуха цува тIайлашиву исват бувайсса. Укун хьхьури цахьхьунна ласун шайссагу, кIулшивуртту куртIсса ва цIакьсса дунийри.

Ванал дурцири давурттал ккал-аьдадрах, куртI къавхьуну, дахьва ябитарчангума, чIалай бур ва бюхттулсса даражалул журналистгу, уххаву къакIулсса захIматчигу ушиву. Так телевидениялул захIматчи акъарча, ци дулларчангу, ссаха зурчангу, оьр­мулухунсса зузи инсан ушиву.
ДакIний бакъар ци иширай багьссарув жува Кьукнив, дакIнин бутлай, бутангу къавхьунни цукунчIав. Гъумуксса мероприятиялия махъ цачIанма бачин бувсса ххай бура. Амма ххуйну дакIний бур, Ссалам Хавчаевлул жува циняв цачIанма хъамалу бувцусса. Хъуннасса кьюкьа. Гьарма гьанттайнссаннул дузал аврил ялув авцIунугу ивкIсса.Творчествалул зузалт бавтIсса ванал ужагърай та кьини ца ххуйсса культуралул мажлис хьуссия. Оьрмулухун хъамакъабитансса.

Ттунна ялагу ссай дакI даркьуна учирча, тава ппурттуву, кьунияхъайсса шиннардил хьхьичIра, бюхъай ххишала­ссагума хьуну дикIангу, Ссалам Хавчаевлул буттал шяраву ххаллилсса къатри дурну дия.Таний, нажагьсса бакъа, бувая чантI куну буттал аьрщарай къатри дуллай байбишин. Бувагу бакъая къаучиннача, так-тукну бия. Тания махъ, МахIачкъалаливгу хьуссара вайннанний ичIува, хъамал ххирасса, хъамаллураха хIурматгу буван кIулсса Ссалам АьбдурахIимовичлул хъихъи лавсминнащал архIал.

Цува куна ялун увкIная ххарисса, дакI тIиртIусса, ихтилат кIукIлусса, ттюнгъасса Жаннагу нясив хьуну бур ванан. КIинналагу хIарачатрайну вай­ннал ужагърая лакрал, дагъус­ттаннал культуралул кюру хьуну бур. Инсантал кIункIу тIисса. Гьарнан тIааьнсса, язисса. Интеллигенциялун дахIалайсса. Ссалам Хавчаевлул юбилейри тIурчагу, Лакрал театрданувусса мероприятиягу дия лакралгу, щалва Дагъусттанналгу культуралул, телевидениялул цIа-кьини гьаз дуллалисса даву. Ва иширавагу чIалай ур Ссалам Хавчаев. Миллатрал культуралуха, телевидениялуха хIакьну, къуллугърай лавгун бур ванал оьрму, уттигу вава бюхъулий къуццу тIий ур. Цала тIийкун: ца гьантта телевидениялия арх увцун гьан бувну акъар.
ЧIа тIий бура вава ку­ццуй­сса, телевидениялул ххуллу-ххуттая хIура къавхьу­сса чIя­русса,цIуллусса шинну яба­цIайсса харизмалул заллу ва зузала Ссалам Хавчаевлун.

ПатIимат Рамазанова