Владимир Путин хьунаавкьунни Федор Щукиннущал
Вай гьантрай Аьрасатнал президент Владимир Путин хьунаавкьунни Дагъусттаннал бакIчи Федор Щукиннущал.
Владимир Путиннул Федор Щукиннухь барча дунни Дагъусттаннал бакIчинал къуллугърайн увчIаву.
«Ва дур личIинурасса регион, Ккавкказнавусса Аьрасатнал форпост, ва дур чIявумиллатру бусса республика. Мунияту ттун ччива цалчин ярглий аьркинсса даражалийсса хIурмат буван чIявуми дагъусттанлувтурал традициялийнусса диндалул, буттахъал традициярттал, дагъусттанлувтурал культуралул, Дагъусттаннан кумаг буллан экономика, промышленность лядуккан давриву, миннул гьанулий дузал буллан социал масъаларттугу», – увкунни паччахIлугърал бакIчинал.
Хьунабакьаврий билаятрал президентнал бувсунни социал сфералийн багьайсса балжийсса задачарттая, кIицI бунни демография хъин чулийсса душиву.
«Ца сменалий дуклакисса оьрчIру гьарза хъанай, кIилчинми ва шамилчинми сменартту чан хъанан аьркинссар. Амбулаториярттаву, поликлиникарттаву медициналул аьркиншивуртту бартдигьаву ялу-ялун ххуй-хъин хъанан аьркинссар. Мукуннасса тагьар дикIан аьркинссар оьрчIал багъирдавугу», – увкунни Владимир Путиннул.
ЛичIисса тема – СВО-лул гьурттучитуран ва миннал кулпатирттан кумаг буллалаву. Дагъусттаннал бакIчинал тIимунийну, дагъусттанлувтурал чIярусса шиннардил мутталий тасттикь буллай бур Ватандалийн дакI тIайлану бушиву.
Дагъусттанлувтурал паччахIлугърал чул бугьлай бур агьамми масъаларттан хасну. Ми бур къуллугъ буллай Ярагъбу Гужирдаву, гьуртту хъанай бур хасъсса дяъвилул операциялувух личIи-личIийсса къуллугъирттай, миннувух – яла лавайминнуйгу.Талай бур ххаллилну, виртталну. Аьркинссар кумаг буллан жула аьралитурангу, миннал кулпатирттал члентурангу, аьралуннава зана хьуминнангу», – увкунни Владимир Путиннул.
Республикалул каялувчинал президентнахь бувсунни региондалий дуллалисса давурттал хIакъираву.
ПаччахIлугърал бакIчинал Федор Щукиннун чIа кунни давриву тIайлабацIуртту: «Дагъусттаннащал ина утти гъанну кIул хьунна – ина ияв республикалул верховный судрал бакIчину, гьай-гьай, кIулссар региондалул циняв захIматми масъалартту. ЦIанасса ппурттуву тIалавну бикIантIиссар вил сакиншинначинал ва циняв бутIраву давуртту бартдигьин кIулсса инсаннал бюхъу».
Федор Щукиннул президентнахь барчаллагь увкунни вихшала дишаврихлу ва кумаграхлу, мукунна республикалух даиман дуллалисса къулагъасрахлу. «Ина хьхьичI бивхьусса циняв масъалартту бартбигьлантIиссару», – увкунни Дагъусттаннал бакIчинал.
ХIадур бувссар
ХI. Аьдиловлул