Ватандалул Вирттаврал Кьини
Жулва билаятрай 2007-ку шиная шиннай декабрьданул 9-нний кIицI лагайсса Буттал кIанттул Вирттаврал кьинилун хас дурсса батIавуртту хьунни лакрал щархъавугу.
Райондалул ЦБС-рал зузалтрал Гъумучиял дянивмур даражалул школалий дунни «Героям Отечества – Слава» цIанилусса ссят. Шикку дуклаки оьрчIахь библиотекарь ПатIимат ЛухIуевал бувсунни ва байрандалул тарихрая, 1917-ку шинал Октябрь революция хьуннин кIицI лаглай бивкIшиву Георгиевский кавалертурал Кьини хIисаврай, хасну ва кьини Аьрасатнал императрица Екатерина II цIакь дурну диркIшиву империялул яла лараймур аьралий награда – «Императорский Военный орден Святого Великомученика и Победоносца Георгия», большевиктурал му яла дукьан дуршиву ва 1943-ку шинал дуккан дуршиву ва наградалучIан гъансса цамур – Славалул орден.
ОьрчIал хьхьичI ихтилат бунни 7 «А» классрал каялувчи Написат Къапиевалгу. Ванил оьрчIан дунни билаятрал ларайсса наградарттал ва Вирттаврал видеообзор. Дунни ва темалун хасъсса викторинагу.
Гъумук оьрчIал библиотекалий щаллу дурну дия «Вирттал тачIав къалитIайссар» тIисса цIанилусса луттирдал выставка. Шикку бия Аьрасатнал империялул, Совет Союзрал ва ттизаманнул вирттавраясса луттирду.
ШавкIрав, байбихьулул классирттал учитель Зайнаб Эфендиевал ва библиотекалул хъунмур Фрунзина Кьадиевал хIадур дурну, хьунни «Твои сыны, Россия» цIанилусса классрал ссят.
Щардал школалий хьунни линейка ва «Наследники Победы» тIисса интеллектуальный тIуркIу.
ГьунчIукьатIрал дянивмур даражалул школалий хьунни Чувшиврул дарс. Ва хIадур дурну дия школалул учительтал Жавагьи Штанчаевал ва Шура Сулаймановал.
КIундиннал дянивмур даражалул школалий шяраваллил библиотекалущал цачIуну хьунни «Для СВОих» тIисса акция. Ванил лагрулий ва дуклаки оьрчIал хIарачатрацIух дартIунни СВО-райн гьан бувансса ссайгъатирттал посылка. Шивува бишин оьрчIал чивчуну бия чагъарду ва открыткарду.
ЧIарттал школалий библиотекалущал цачIуну хьунни Чувшиврул дарс. Ваний дуклаки оьрчIахь бувсунни Буттал улклул тарихрал виричувсса кьинирдая, аьралий наградарттал тарихрая. ДакIнин бивчунни Буттал КIанттул цIанийсса Хъун дяъвилийгу, локальный дяъвирдайгу, СВО-райгу жанну дуллусса ватанлувтал.
Укуннасса батIавуртту хьунни райондалул цайми шяраваллавугу.
Библиотекалийнсса
цалчинсса аьрххи
Инсаннал оьрмулуву луттирал бугьлагьисса кIану хъунмар. Гъумук Райондалул оьрчIал библиотекалий хьунни «Знакомство с библиотекой. Книга и библиотека в жизни человека» тIисса цIанилусса дарс.
Ванийн оьвкуну бия Гъумучиял дянивмур даражалул школалул 1 «Б» классрал дуклаки оьрчIайн ва классрал каялувчи Зайнаб Катаевайн.
Ва иширан хасну хIадур дурну дия «Листайте нас, читайте нас, и мы всему научим вас» тIисса луттирдал выставка.
ЧIявуми мюрщултрал ва кьинисса аьрххи библиотекалийнсса цалчинсса аьрххи хъанай бия. Мунияту ЦБС-рал директор Мариян Аьшаевал вай кIул бунни библиотекалул тарихращал, библиотекалул системалуву цIакь хьусса аьдатирттащал. ОьрчIан кIул хьунни «мужаллат» цирив, «суперобложка», «титульный лист», «переплет», «абонемент», «читальный зал» цирив ва чIявусса цаймигу цIусса затру. ОьрчIащал дунни «Заверши фразу» тIисса викторина. Ахирданий оьрчIан дуллунни хъуни дакъасса бахшишругу.
Библиотекалул ссят хIадур дурну дия ОьрчIал библиотекалул хъунмур Зарема Исяевал.
Инишиял библиотекалий
Инишиял шяраваллил библиотекалий хьунни терроризмалийн къарщисса «Против огня вражды» тIисса батIаву. Ва хIадур дурну дия библиотекалул хъунмур ПатIимат Аьлиевал.
Ва кьини библиотекалувун бувкIсса оьрчIахь ПатIиматлул бувсунни терроризм ттизаманнул иширттаву яла нигьачIишиву хъунмур иш бушиву. Ца миллатран вамур къаччишиврул, толерантность дакъашиврул буцайшиву экстремизмалучIан, расизмалучIан ва дяъвилучIан. Мукунма оьрчIахь бувсунни ца къахьунмур хьусса чIумал инсаннан, цува уруччиншиврул, цукун къуццу тIун аьркинссарив.
ХIадур бувссар
Бадрижамал Аьлиевал
