Ватандалул мурадру буручлачиминнахсса аякьа
Ва нюжмардий ЦIуссалакрал райондалул администрациялул бакIчинал хъиривчу Рустам Сулайманов хьунаавкьунни хасъсса аьралий операциялул гьурттучинал буттащал.
Аьраличунал ппу увкIун ия хасъсса аьралий операциялул гьурттучитурал кулпатирттайн багьайсса юридий масъаларттал хIакъиравусса бувчIин бавуртту дан.
Рустам Сулаймановлул гьаз бувсса цинявппагу масъалартту цала аякьалийнгу лавсун, миннул хIакъиравусса маслихIатругу ккавккунни. Ванал мукунма кIицI лавгунни, Ватандалул мурадру буручлачисса аьралитуран ва миннал кулпатирттан шайсса кумаг бан ва чIарав бацIан хIадурну бушиву.
– Жу хIарачат бару, аьралитал ва миннал нину-ппу ялугьлагьи къабувну, нюжмардий цал чара бакъа кьамул бан. Махъсса ппурттуву чIявусса бур личIи-личIисса масъаларттал хIакъираву цIухху-бусурду бан букIлакIисса. Жул даврил хьхьичI ххуттайн лавсъсса агьамми мурадру аьралитурал масъалартту дузрайн буккан бавур, – тIий ур Сулайманов.