«Дагестан» РИА-лий хьунни «Доблесть гор» тIисса республикалул программа щурущи даврил ма­съалартту ххал бигьлагьисса пресс-конференция.

ДР-лул БакIчинацIунсса паччахIлугърал къуллугърал, кадрардал ва паччахIлугърал наградарттал управлениялул каялувчи Земфира Кашкаевал кIицI лавгунни, ва программа хъанай душиву Аьрасатнал президент Владимир Путиннул хIукмулийну щурущи дурсса «Время героев» тIисса федерал программалуцIунсса.
— Федерал хьуннав, регионал хьуннав, программа щурущи дур­ссар хасъсса аьралий операциялул ветерантурал ва хIакьину тикку гьуртту хъанахъиминнал дянива паччахIлугърал структурардай зунсса бюхъу-даража буми личIи бансса мурадрай, – увкунни Кашкаевал.

Ванил мукунма бувсунни «Время героев» федерал программалул ва «Доблесть гор» регионал программалул дянивсса тапаватшиврия.
Агьаммур личIишиву дур программа региондалуцIун дархIуну душиву. Му мукун був­ссар цава-ца инсаннал кIирагу программалийн аьрзри къабулуншиврул. Яни «Доблесть гор» программалий гьуртту хьун бюхъан тIий бур так Дагъусттаннаясса инсантураща. КIилчинсса личIишиву. Анкетагу дуцIин дурну, суаллахьхьун жавабругу дуллуну махъ, хьхьичIунсса хIасиллу хьун дурсса гьарцагу гьурттучинащал кадрардал комиссиялул буллантIиссар собеседование. Мунил лагрулий хьхьичIунсса хIасиллу хьума язи угьлагьиссар Дагъусттан Республикалул структурардай каялувшиву дуллансса кадрардал резервравун.

Шамилчинсса личIишиву. Агарда федерал программалийхчил бюхълай бивкIхьурча аьралий къуллугъгу кьабивтун дуклан, «Доблесть гор» программалуву ккаккан бувну бакъар аьралий къуллугъ кьабитансса пункт. – Жула аьралийтурал хьхьичI бавцIусса агьаммур масъала хъанай бур аьралий бурж биттур баву, – увкунни Земфира Кашкаевал. Мукунма ванил кIицI лавгунни сияхIрайн лавсъсса гьурттучитураща бюхъан тIий бушиву электрон журалий цала кIулшивуртту ларай дан.
ЦIанасса чIумалнин так ца Дагъусттаннай дусса дур хIасул дурну укунсса кьяйдалий кIулшиву ласунсса каширду.

Аьрасатнал Виричу, «Время героев» федерал программалул гьурттучи Тамирлан АбутIалимовлул кIицI лавгунни «Доблесть гор» программа зий душиву лавайсса даражалий, мукунма президент Владимир Путиннул хасъсса аьра­лий операциялий ватандалул мурадру буруччаврил ххуллий талатисса аьралийтал ккалли бувшиву элиталун.
ДР-лул БакIчиначIасса Па­ччахI­лугърал къуллугърал, кадрардал ва паччахIлугърал наградарттал управлениялул каялувчинал хъиривчу Аьбдулхаликь Исрапиловлул бувсунни «Доблесть гор» программалул цалчинсса этапрая.

-Аьрзри буллалиминнан багьлагьи­ссар дуцIин дан анкета, чичин шанма суа

Аьрзри булун ккаккан бувну буссар ца барз – февраль зурул 4-нния мартрал 6-ннийн. Программа ккаккан дурну дуссар Дагъусттаннай сияхIрай бусса инсантуран. Аьрза буллалима икIан багьлагьиссар ларайсса кIулшиву дусса ва каялувшиву даврил даву кIулсса, – увкунни ванал.
«Защитники Отечества» фондрал каялувчи Идрис Кьурбановлул бувсунни СВО-лул ветерантураща ва хIакьину тийх гьуртту хъанахъиминнаща аьрзри булун бюхъан тIий бушиву фондрал сайтрайхчин.

Зулайхат Тахакьаева