Апрель зурул 5-мур кьини уттигъанну дунияллия лавгсса ттула шяравучу СантIухъал Башир увсса кьини духьувкун, кIива-шанма махъ къаувкуну бацIан къахьунссар. Ца инсан дунияллия лагаврийну щала шяравалу ятинну личIаврил кьурчIишиву цал уттигу ттирикIин.
Бушиву къакIулли Цалчинмур ЦIувкIрав ванал бивкIу къакьувтIусса къатта. Сайки гьарца кулпатрал чивчунни Ватсапрайсса шяраваллил чатраву бювхшиву, кьурчIи бивзшиву Баширдул нязаннивсса бивкIу. Шиккува кIицI лаганна, сайки ххюттуршунниха ливчусса цIувкIул бусса ккурандалунгу ванал цIа дирзшиву. Вагу Баширдул хIурмат лахъну бушиврул барашинна дуллалисса иш хьушиву.
Ссавур Баширдул бусравшиврул феномен? Зунттаву увсса, хъуна хьусса хIакьсса зунтталчунал дакIниву мудангу цIакь хьуну бикIай, бикIангу аьркинссар, буттал къатлуцIа, лявхъу миналуцIа, миллатрал мазрацIа, культуралуцIа, колоритрацIа хьун ацIаву къакьамулсса, кьюкьалдарансса ишри тIисса пикри. Данди уккаву. ЯхI-къирият дусса Баширдуву буттал аьрщарахсса ччаву дия, буттал къатраха аякьа дия, шяраваллил агьулданул чIарав ацIайва. Зунтталчунал хасиятру, менталитет ванан ларайну дия. Ванан къакьамулну бия яхI-къирият думиннан къакьамулмур. Ччай ия духлагаврил дазуйн дирсса шяравалу ядан, гьаз дан. Мудангу буруккинттарай икIайва, дунияллийх цIа ларгсса, кьатIаллил билаятирттаясса журналистътал бучIайсса цIанихсса шяравалу эяллайн дуккан ританнув, жула ттаттахъал рухIирдан асар хьунсса, жуйра ттангъа хьунсса иш хьун битаннув тIий. Ххаллилсса дакIнил ва марцIсса пикрирдал заллу ия. Шяраваллил жяматрал оьрмулуву хъанахъисса гьарцагу ишираву гьуртту шайва. Хъинну сахаватсса, дакI дулун хьусса ия. Миллатрал ххазинарду ябаврил, буруччаврил ххуллий хIарачатрайнасса ия.
Апрель зурул 5-нний ванан 63 шин хьунтIиссия. Къанясивну ляркъунни жул Баширдун ряхцIаллий шамилчинмур инт. Амма ванан лайкьсса, лахъсса кьимат бишлашисса жагьилтал ялун нанисса никиравугу биялсса бушиву чIалай, буттал аьрщарах бунияласса ччаву дусса Баширдул хъинбаларттал ххуллу бяличIан къабитанхьуви, ванан дуван дакIнийцири давуртту гихуннай жагьилтурал дюхъан дурну дулланхьуви тIисса тамахI цIакь хъанай бур дакIниву. Уттигъанну Баширдул ца хьхьичIунма дуснал:«Баширдущал занай аьдатну, ЦIувкIрав ачинсса дакIрагу дакъар утти», – куна. Баширдун дуснал ва калима къаххуй дизантIиссия. ДакI дуну, дакъа, Ватан мякьссар мудангу лага-бучIайминнах. ЦIувкIравсса ххуллугу тIивтIунмассар дакIурдин. Баширгу лявхъу кIанурхха ЦIувкIул. Жула ппухълуннал минар. Ватан жухра мякьнурассар…
ПатIимат Рамазанова
