Ларгсса нюжмардий МахIачкъалалив хьунни дунияллул халкьуннал дянивсса элмийсса конференция «Ватандалуха къуллугъ баву – исламрал кьиматрайсса ххуллур» тIисса цIанилу.
Ваний гьуртту хьунни кьатIаллил билаятирттаятусса чIявусса хъамал. Спикертуравух бия Дагъусттаннал муфтий щайх АхIмад Афанди, Къиргъизттаннал муфтийнал цалчинма хъиривчу Талант-ажы Темирбаев, Татарстаннал муфтий Камиль-хазрат Самигуллин, Белоруссиянал муфтий Абу-Бекир Шабанович, Баргъбуккавал Гуржисттаннал муфтий Этибар Эминов, Египетнал диндалул иширттал министрнал маслихIатчи щайх МухIаммад АьбдурахIим аль-Баюмий, Нигериянавасса ва цаймигу билаятирттаясса вакилтал.
Ва конференциялул гьанумур мурадгу бия, Аьрасатнал регионная ва кьатIаллил билаятирттая рувхIанийсса лидертал, аьлимтал, интеллигенциялул вакилтал бавтIун, исламрал диндалувугу Ватандалул ва агьалинал хьхьичIсса бурж хьхьичIунну ккаклай бушиврия жагьилтуран бувчIин бувансса.
Конференциялул лагрулийсса дискуссия хьунни Дагъусттаннал паччахIлугърал университетраву.
«Аьрасат – ттул тарихри» тарихийсса паркраву дия пленарное заседание. Дагъусттаннал муфтийнал цIанияту бавтIцириннахьхьун ссалам буллай, Республикалул муфтиятрал председатель Аьбдулла Салимовлул барчаллагь увкуна архсса билаятирттая бувкIсса хъамаллурахь.
Миллатирттал политикалул ва диндалул иширттал министрнал къуллугъ чIумуйну бартбигьлагьисса Темирлан АбутIалимовлул увкуна: «Ватандалуха къуллугъ баву жяматрал хьхьичIсса алвагьсса бурж бушивруцIун, Заннал хьхьичIсса буржгур. Дин дусса инсан лагма-ялттуминнан эбратну къуццу тIун аьркинссар. Дагъусттан, миллатругу чIявусса, диннугу личIи-личIисса республикар, агьали бавкьуну яхъанахъисса, цашиврул ххуллий агьамсса давурттугу дуллалисса».
Исламрал культуралун, элмулун ва кIулшивуртту дулаврин кабакьу буллалисса фондрал директор Михаил Грязновлулгу кIицI лавгунни рувхIанийсса просвещение, мяърипат ххуй даву хьхьичI ххуттайн лавсминнуву ца гьанумур масъала бушиву.
Абу-Бекир Шабановичлул чIурчIав дурна Кьурандалул луттирай Ватан дуруччара тIисса оьвчаву душиврий ва гьарцагу бусурманчувнан граждан жаваблушиннарал агьамшиврий.
«Гьарцагу динналул инсаннал буржри цалла аьрщи дуручлан. ХIисав ласайсса инсаннал цала лагма-ялттугу цашиву, нахIушиву хIасул дувансса хIарачат бикIан аьркинссар», – увкунни Ухссавнил АьсатIиннал муфтий ХIажимурад Гацаловлул.
Диндалул аьлимчув Щайхульислам Хамидил «Ватандалухсса ччаву – иман душивур» тIиссса калима тикрал дуллай, Камиль-хазрат Самигуллиннул бувсуна Ватан язи къадугьайшиву, Заннал му жунна дулайшиву, Заннал дуллумур аманат хIисаврай ядуллан жулвагу бурж бушиву.
Вава мяъна-мурадрайсса ихтилатру бувна Дагъусттаннал бакIчинал маслихIатчи Энрик Муслимовлул, Аьрасатнал бусурманнал рувхIаний управлениялул муфтийнал кумагчи Ильнар Гайнуттиновлул, иеромонах Григорий Матрусовлул ва махъминналгу.
Ва конференциялий гьуртту хъанахъими бивунни Редукторный поселокрай буллалисса Ися Идавсил (аь.с.) рувхIанийсса центрданийнгу.
ПатIимат Рамазанова
