Февраль зурул 16-нний 100 шин бартлаглай дур 10-хъул шиннардий Кку­ллал колхозрал председательну ивкIсса, Дагъусттаннайгу, мунил кьатIувгу цIа дурккун диркIсса, хIакьинусса кьинигу чIявуссаннал дакIний-мазрай усса инсан, ХIажинал арс МахIаммадхIажи ХIажиевлун. Ва каялувчину уссаксса хIаллай колхозрал, кутакгу цIакь хьуну, паччахIлугърал ккаккан дурсса планнугу ххинугу биттур дайсса диркIун дур.
1969-ку шинал Дагъусттаннал колхозниктурал конференциялий МахIачкъалалив цала лахълахъисса мукъуву МахIаммадхIажи ХIажиевлул куну бур: «Ххаришиву дур дакIний лирккун шиная шинайн колхозрал кьудрат гужлан хъанахъаврия. Агарда колхозру дуллай байбивхьусса шиннардий ласайсса диркIхьурча ца гектардания 5-6 центнер къалмул, ца оьлища ттизайсса диркIхьурча 300 литIра накIлил, ца яттил хIайвандалия дукьайсса диркIхьурча 1 килорайн ди­ллалисса ппал, цIана жу ласлай буру дянивну 25 центнер къалмул, накI ттизлай буру ххюлийну ххишаласса, ппал дукьлай буру мукьлийну ххишаласса. Арцуйнусса доход колхозрал цIанасса чIумал личлай дур 2 миллиондалия».
Учин бигьанугу, арцул 2 ми­ллион та чIумал хъинну хъунмасса гуж бусса арцу диркIссар.
ХIукуматрал баян бувсса бяст-ччалдануву хьхьичIунсса кIантту бувгьуну тIий, Гьарун Саэдовлул цIанийсса Ккуллал колхозран 1968-кусса шинал буллуну бивкIссар СССР-данул Верховный Советрал, СССР-данул Министртурал советрал ва ВЦСПС-рал чулухасса Занази ЯтIул Ттугъгу, арцуйнусса 1-чинсса бахшишгу. Щаллагу жулла паччахIлугърайсса колхозирттал дянив ца яла хьхьичIунмур хIисаврай, Ккуллал колхозран дуллуссар «ХIурматрал лишан» тIисса орден. Ва тани ккаллину бивкIссар ххишала бакъа хъунмасса кьиматран.
МахIаммадхIажи каялувчину уссаксса чIумул мутталий колхоз мудангу диркIссар республикалул ХIурматрал улттуй. Колхозрал хозяйствалул сияхIрай бивкIун бур 60 азарунния ливчусса ятту, 4 азарва лухIи гъаттара, 405 балчан, 55 трактор, 7 комбайн ва м.ц
Хъун дяъвилулгу гьурттучи, аьраяллил орденнал ва медаллалгу заллу МахIаммадхIажи ХIажиев увчIуну ивкIссар СССР-данул коммунист партиялул ХХIII-мур съездрал делегатнугу, РСФСР-данул Верховный Советрал депутатнугу. Ванал оьрму хIисав хъанахъи­ссар Ккуллал жяматрал ва Да­гъусттаннал тарихрал ца ккалли бансса бутIану.
Жул корр.