Сентябрьданул 8-нний «Илчи» кказитрал редакциялул каялувчи Руслан Къардашов ва на, ХIасан Аьдилов, лавгру МахIачкъалаллал 11-мур лицейрайн. Шиккусса футболданул майданнив най дия «Лига Лакии» тIисса, лакрал шяраваллал дянивсса футболданул турнир.
Жу кIул хьуру ттинин турнирданул каялувчину ивкIсса Руслан ЖахIпаровлущал ва цIанасса каялувчи Зайнуттин ХIасановлущал. Вайннал жухь бувсунни ва турнирданул аьмсса хIалкьазиялия ва цIанасса тIуркIурду нанаврил тагьардания.
«Лига Лакии» турнир сакин дурну дур 2016-ку шинал «Гъази-Гъумучи» ккурандалул сипталийну. Таний турнирданий гьуртту хьуну дия 64 шяраваллил команда. Муния махъ гьуртту шайсса дур шяраваллал 40- 45 команда. Лакрал жагьилтурал цалла кIунттихьхьун ларсун дур турнир даврил хьхьури.
Руслан ЖахIпаровлул тIимунийну, турнир даврил хъунмур мяъна-мурад хъанай бур шагьрурдай ялапар хъанахъисса лакрал шяраваллал жагьилтал цачIун баву, куннащал кув кIул баву, дусшиву цIакь даву. КъакIулминнангу лакку маз лахьхьин хIарачат баву.
Гьар шинах увчIайсса ур турнирданул каялувчи. Шахьуватусса Руслан ЖахIпаровлул хъирив, гьашину увчIуну ур Уручратусса Зайнуттин ХIасанов.
«Лига Лакии» турнирданул хьхьичIунми командартту гьуртту шайсса дур шагьрулул ва республикалул футболданул турнирдайгу.
«Лига Лакии» турнирдания чIун-чIумуй буслансса умуд бур жул.
ХIасан Аьдилов
