Ларгсса шинал Аьхъардал жяматрал маслихIат бувна гьарица шинал август зурул махъра-махъсса алхIаткьини Шяраваллил кьини аьдатравун дутансса. Ва шинал август зурул 23-нний ЦIуминалийсса Аьхъардал шяраву лахъа-хъунсса даражалий кIицI ларгунни Шяраваллил кьини.

Ванинсса хIадуршинна дурну, чятирду бивщуну, скамейкартту, столлу бивхьуну бия администрациялул къатрал хIаятраву. ТIивтIуну бия авадансса ссупра. БучIан бувну бия дукрарду дансса цIигьуртал. Байрандалул программагу гьарза-гьартасса дия.

КIюрххила баллай бия ­музыкалул, балайрдал, тIуркIу тIутIисса оьрчIал тяхъасса чIурду. Мажлисрайн оьвкуну бия лакрал балайчитурайн. БучIан бувну бия оьрчIру ­бялахъан буллансса аниматортал.

ЦIуминалийн бивзун махъ Аьхъардал жяматрал кIилчинни дуллалисса Шяраваллил кьини. ЧIявусса бакIрачIан бувкIсса, цимиллагу мина цIу дан багьсса жяматрал ляличIиссара ххаришиву дия байрандалия.
Щарнил жямат барча­ллагьрай бия ва кьини кIицI лаган сиптачиталну бувкми­ннайн. Жямат цачIун батIин, дан-дитанмунил маслихIат ­бувансса сиптачину хьуну ия шяраваллил администрациялул бакIчи ГъазимахIаммад ХIасанхIусайнов. Букъавсун къабучIихьунссар, Аьхъардал шяраваллил бакIчишиву дуллалисса, щарнил чIалачIин ххуй дан, жямат цачIун бан хIарачат буллалисса, цинявнначIагу хIурматрайсса инсан ушиву ГъазимахIаммад. ХIакьинусса кьини шяраву ванал каялувшиндарай дурну дур жяматран мюнпат бусса цикссагу давуртту.

 

Байрандалий гьуртту хьун бувкIун бия архсса шагьрурдай ялапар хъанахъисса Аьхъардал агьалигу.
Шяраваллил тарихрая, хIакьинусса масъаларттая, хьхьичIунсса инсантурая бусласисса, шяраваллил цIа-кьини бюхттул дуллалиминнахь ­барчаллагь тIутIисса ихтилатру бувна СалихI Мусаевлул, Сережа Сулаймановлул, ХIабибат Аьлиевал, Заира Шабановал ва цайминнал. Мажлис бачин бувну ия жяматран бусравсса Ибрагьимхалиллул арс Аьлил СалихIов.

– Ххирасса жямат! Ва ЦIуссаминалийн бивзун махъ цинявппагу лагма лаган бувну дуллалисса кIилчинсса байран хъанай дур. Жяматрай аргъ дизаннав, дуллалимуницIун Аллагьнал кабакьиннав, жула дянивсса дусшиву цIакь хьуннав. ЦачIусса иширтталли инсантал гъан байсса. Жува ххариссагу, пашманссагу иширттай кунначIан кув бухлан, чIарав бацIлан аьркинссару, – увкуна Аьлиллул.
Ихтилатру буллалими барчаллагьрай бия кутIасса чIумул мутталий байран сакин дан хIадуршинна дурсса жагьилтурайн. ЦIуминалийсса щархъаву байранну дуллан ва халкь цачIун батIлан, Лаккуй кунна, уртту-тIутIавун дахьларгсса хъу-лухччив, арду-майданну бакъар. Мунияту, вайннан пикри хьуну бия администрациялул къатрал хIаятраву цачIу байран дувансса.

Щарнил жяматгу, байрандалийн бувкIсса хъамалгу барча буллалисса ­ихтилат бувна ГъазимахIа­ммад ХIасанхIусайновлул.
– Аьхъардал жямат цIусса миналийн бивзния шинмай укунсса байран кIилчинни дуллалисса. ЧIявусса жагьилтал ва мюрщи оьрчIру бур байрандалийн бавтIун. Байран даврил хъунмур мурадгу, ялун нанисса никирал оьрчIру, душру куннащал кув кIул баву, миннахь адав-инсапрайсса насихIат бусаву ва жяматрал иширттавух хIала буххан бавур. Гихунмайгу умуд бур гьарица шинал август зурул махъра- махъсса алхIаткьини Шяраваллил кьини кIицI дуллансса.

Жяматраву цуя-ца инсан акъар байрандалийнсса хIадуршиндарай гьурттушинна къадурсса. Барчаллагь учин ччай ура ва кьини хъун дан бувкIсса хъамаллурахь, байран сакин даврил иширттавух чялишсса гьурттушинна дуллай бивкIсса, чIарав бавцIусса инсантурахь, – увкуна ванал.
– Хъинну ххарину ура ттула гъанчунащал, щарнил жяматращал хьунаакьин бюхъаврия. Байраннайгу, гьар иширавугу Аьхъардал жямат цачIун батIавриву, так ххуйшивур дусса. Жува бавкьуну, куннал кув бувгьуну къуццу буллай бунутIийри шяраву тамансса давуртту дузрайн дуккан дан бювхъусса.

 

ДакI ххарину дур шяраваллил цIа-кьини гьаз дансса хIарачатрай зузисса жагьилтурайн я щувкун. Укунсса чиваркIунналли жяматрал кьини лахъайсса. Жува жулва буржну ккалли буллай буру жяматрал багьу-бизулух буругаву, халкьуннан хъинмур ва ххуймур буллалаву, мудангу чIарав бушиву ккаккан баву. ЧIа тIий ура буттал шяраваллил агьулданун ванияр тихуннайгу ххарисса кьинирду. Ялуннайгу цашиву ядуллан, буттахъал аьрщарал цIа-кьини бюхттул дуллан цIуллушиву дулуннав. Ва байрангу жунна барачат хьуннав! – увкуна ХIасан ХIасановлул.

Ихтилатирттал лях-карах мюрщимигу, жагьилмигу, хъунимигу лагма лавгун, къавтIий, балайрду тIий, таза-тяхъа бувккун бия. Ва байрандалий жяматран ххуйсса сант дагьуна цала цIуцIи кIанттурдая ва цIюрувкьусса масъаларттая маслихIатру ккаккангу.

Имара Саидова