Райондалул бакIчи Зураб Куччаев ивунни Уривгу. Ванащал бия райондалул бакIчинал хъиривчу Малик ХIусманов, азарханалул хъунама хIакин АьбдурахIин Дибиров, энергосетирдал ва ххуллурдал къуллугърал пишакартал.
Шяраваллил активращалсса хьунабакьаврий сукку бунни вай масъалартту: хIачIайсса щин диял хъанай дакъашиву, бух хьусса щинаххуллу баххана бан багьлай бушиву, машинартту лагайсса ламу лекьавайсса тагьарданий бушиву. Хаснура къулагъас дурунни инсантал ялапар хъанахъисса къатрайн лахIуни дуккан бюхъайсса нигьачIаврил ялув.
Муния махъ, ххал бивгьунни агьалинал къатран нигьачIаву дусса кIану, вичIидирхьунни къатрал заллухъруннах.
«Тагьар хIисав дурну, анавархъиндарай чаран лякъин багьлай бур. Инсантурал мюхчаншиву хьхьичIххуйттай дикIан аьркинссар», – увкунни Зураб Куччаевлул. Тапшур бунни ччясса мутталий инсантал нигьачIаву дусса къатрава чIумуйнусса цайми къатравун бизан буван. Масъала райондалул бакIчинал цала къулагъасрайн лавсунни.
Хъирив Куччаев ивунни фельдшертурал пунктрайн. Ихтилат бунни цIуллу-сагъшиву дуруччаврил зузалтращал, ххал диргьунни захIматрал шартIру, дарурттал дузалшин. Мичча ивунни школалийн. Ялтту увккунни классирттал, гъалгъа бунни педагогтуращал, ххал диргьунни дуккаврил шартIру, коллектив ябаву мурадрай, ххисса оьрчIру кIункIу бансса чаранну.
Хасъсса къулагъас дурунни шяраваллил тарих ябуллалисса школалул музейрах. КIицI лавгунни хъирив нанисса ник тарбия даврил ххуллий магьирлугърал ирс ябаврил агьамшиву.
«Школа, музей, библиотека – вай шанма агьамсса идаралул бияла хъунмассар цумур-бухьурчагу кIанттул ялун бучIантIимур цIакь баврил цIаний. ОьрчIал кIулшиврул даража лахъсса бикIан аьркинссар, райцентрданий дуклакиминналгу, архсса шяраваллаву дуклакиминналгу личIишиву дакъа», – увкунни Зураб Куччаевлул.
Уриннал жяматрал сукку бувсса масъалартту райондалул бакIчинал цала къулагъасрайн лавсунни, махъ буллунни гьарца суалданун чаран лякъин.
Зулайхат Тахакьаева