Аминат АхIмадова

ЛякIин бува, бавай

Бавай, лякIин бува вила дакIницIун,
Паракьат дува дакI, къуману дурча.
Къаххуйсса макI кунма най бур ва оьрму,
Цукунни буруччин ванища оьрчIру.

Аьрщарал ца дазуй тIутIив хъяхъа тIий,
Ссурулккуртта бивтун, оьрчIру тIуркIу тIий….
Тамур дазуй тIурча, ттупру пIякьа тIий,
Тахсир бакъа мюрщулт ятинтал хъанай.

ХъункIултIутIул рангсса щаву дур чIалай
Ччаврил ччурччун найсса жагьилнал дакIницI:
Къабувкссар мурадрайн ххуй душнил хиял –
Ххираманал гьаттацI дирхьуссар тIутIив…

Баргъгу ца, барзгу ца жунма аьрщарай –
Дунъяллул хIикматру цинявннан цархха.
Сипатру инсаннал, дакIру иблисрал –
Тарвав бухлагайсса оьшиврул бутIа?

Инай, жагьилшивуй

Агь, оьрмуй, чунмайра, марч кунма, левххун,
Дакъархха ттуй хъару вил хъирив лаллан:
Мусил чIаллу ттигу бувархха биян,
Хияллал дургьу хъю дурархха дюхъан.

Вай ларгсса шиннардил барашин дуллай,
Зунттайсса занч кунма, кIизгу бур чIалай.
Къерттарал бувгьусса къарчигъай кунна,
ДакI дур къазразанну ссахссарив луглай.

Инай, жагьилшивуй, ххархссарав ттущал,
Мусил лахIзардугу лавгссарив вищал,
КъакIулссия ттун дакI аьтIун дикIайсса,
ЦIан хьхьунил пардаврах макьгу лишайсса.

Лажинни, миннатри, на личIан мабав,
Ятинсса мурхь кунма, авлахърай ххяхлай:
Интту щюлли шавай, ссуттил кьакьавай,
Ххуллулссаннах мякьну архнийн ялугьлай.

Ссут

Хъахъи лачакравуccа бургъил бивзрув увкунни,
Хъахъисса махмурданул ар-майданну балгунни.
Хъахъисса чIимучIали, хъахъи тIутIуй щябивкIун,
Хъахъисса мурчал хIахIлил хIаллих гьуркку бувунни.

Хъахъи-мачIасса гьухъри мурхьирдалгу лавххунни,
Хъахъи дарайлул карщив хъачI-бакIалгу дирчунни.
Ссавнийсса ссурулккуртта цIу-хъахъину бивтунни,
Хъахъи чIапIал халича я бияйнийх ливчунни.

Караматшиву бярнил, зурул чаннай пар тIисса,
Хъахъи мусил бюнбутIив щатIаву тIуркIу тIисса.
Хьхьуниву балай тIисса чIелмултгу бур хъахъисса,
Ссавнийсса цIубарзгу бур хъахъи мусил таж бусса.

Хъахъисса къурнил марщай къари дур чIаллу батIлай,
Хъахъисса симангу дур кьаркьсса тIутIуха лахьлай:
ТIабиаьт цIу лаганссар, цIунил тIутIив хъя чинссар,
Къари-бавал дакIниву ссут абадлий личIанссар.

ТалихI

ТалихIрах луглай занай,
Агьлу буссар лиявай,
Амма талихIмур буссар
Ччанналу ккуччу хъанай.

ЧIелмулт чантI чай цIан-чаннай,
Ххарисса макьант дуцай,
Аммарив чIявуссаннан
Балай буссар къабаллай.

Бургъилух лайсалгъарал
Мусил кIунтIайну лачIай.
Амма, цува чят къахьун,
Инсан уссар лаикIлай.

Аруллагу рангирай
Ссурулккуртлул пиш учай,
Аммарив му ххуйшиву
Так ца авдалнан ххал шай.

Интнил оьрмулул хьунийн
Чарххана тIайла буккай.
Амма интнил ххуйшиву
ЧIявуссаннан ххал къашай.

ТалихIрах луглай занай,
Агьлу буссар лиявай,
Амма талихIмур буссар
Ччанналу ккуччу хъанай.

Умудрал хьуву

Ссутнихьхьун гьан дара ина ва ттул дакI,
Хъахъи лаххан бара дакIнил умудру,
Кьурукьну леххара тархъансса ссавнийх,
Зана хьунсса хьулгу аманат бувну…

Дурхха ссутнивугу цила ххуйшиву,
Кьавкьсса чIапIавугу аьжаившиву,
Мурчай лахIлахIисса хъункIултIутIивгу
Исвагьину дикIай, хъахъи лархнугу.

Гъарал кахлил шюшай ттул мукьал кIунтIру,
Ттуруллавух бявххун лагай асарду,
Так ссутнил багъраву, чIун хъамадиртун,
ХъункIултIутIул къупру хъя чай цIунилгу.

Караматсса чIун

Ккаркссарив, ххирама,
Вин тIутIив аьтIий,
Ххаришиврул хьхьемал
ЧIапIив зурзу тIий?

Ккаркссарив вин бярав
Зурул лишангу,
Ттулми яруннаву
Вилмур симангу?

Зунттуяр бюхттулну
Ттун ина чIалай,
Инагу ссурула
Ттун цIуртти батIлай.

Дакъая та хьхьуну
ЧIумул дуцингу,
Дакъая талихIрал
Дазу-зумагу.

Караматсса макIну
Ларгунни чIунгу,
Вав-шав тIисса марчну
ЛирчIунни дакIгу.

Хьхьурду

Агь, цIаншиву вай хьхьурдал
Ссавний цIубарз бакъаний,
Къумашиву ттул дакIнил
ЧIарав ина акъаний.

Хьхьурду, хьхьурду, вай хьхьурду
Дазу-зума дакъасса,
Зунзулчаннал дарайгу
ЦIаннал накьичру дусса.

Вихсса ччаврил ччурччунни
Ттул асардал дуниял,
ЦIансса хьхьурдал лавсунни
Лаласун къашай хиял.

Чаннал ва цIаннал дазуй
Барану хьусса ччавуй,
Яргсса цIукуну лахъу
Ттул хьхьурду чанна дуван.

Ччаврил накьичру

КIяла марххалттанийх
КIяла тIутIащал,
Най бура, най бура
Мурччай пишлищал.

КIяла гьухъувусса
КIинтнил багъраву
Хьунабакьин вищал –
Цалчин ччаврищал.

Лагмава зизлайсса
КIяла марххала
Щашлай бур аьрщарай
Ччаврил накьичру.

Нагу, марххалттаний
Вил цIагу чичлай,
Мурхьирдащал бура
Щугълурду буллай.

Буллалу, буллалу,
КIяла марххалай,
КIяла чалагъайртту
Барзунттайх дичлай.

Жувагу бачинну
МарцI-кIяла ххуллийх,
Чаннасса асарду
Лагма ппив буллай.

БикIанхьуву жувагу

Ина ттун архниява
Ххал хьуну ухьурчагу,
Ххал къавхьу мишан дурну,
Бувккун лавгра на чIарах.

Шинну циксса гьарчагу
Ина хавар къавхьуну,
Ттул дакIниву вил симан
Яхъанай дур уттигу.

Ина махъ къачирчагу,
Вил мурччай бур чивчуну:
«Малагара, аглан хьу,
Хьул личIан тIий бакъарча».

ЛяличIину пар тIисса
Вил лухIи ярунналгу,
Бувсунни, дус, бувсунни,
Тти пашманну ушиву.

Бурхха ва дунияллий
Баргъ ва барзгу ца ссавний,
Цал архIал къабарчагу,
Аьрщарайн чани буллай.

БикIанхьуву жувагу
Бургъи-зурун лавхьхьуну:
ЦачIун къабиярчагу,
Манзилданий маччану.

КIяла арцул марххала

Арцул марххала буллай,
Ва дакI дур ххари хъанай.
Гьарцагу пиягьраву
Ттун дур ххуйшиву чIалай.

ЧIавахьулттил пюруннай
Эмаратсса ттиркьюкьив.
КIинтнил ттун пишкашрансса
КIяласса хъункIултIутIив.

Багъравусса мурхьругу,
Баркьутругу лавххуну,
Буслай булувкьуну бур
Къартту кунма хаварду.

Зукри зурукъяйнттая,
КIутIру марххалттания
Щашлай булувкьуну бур
КьурукIинтнал накьичру.

КIинтнил кьини

КIинтнил чаннасса кьини
Бургъил гъили бувунни.
Зурукъяйнттал макь рутIлай,
Щинал бярду бавцIунни.

Мурчал бярдайх ках учай,
Бургъил тIинттал пар учай,
Пиягьирттал якьутру
Ца-ца дагьну дакъа шай.

Щях бивхьусса марххала —
Аьрщарансса нахIала.
Интту дараччи тIутIив
ЧантI чинтIиссар къупава.

Мурхьирдайсса чIелмултрал
КIинтниха балай гьаз бай,
НякI ссавнил дагьанттувух
Къюмайртту хьуну леххай.

Чаннасса кIинтнил кьини
Бургъил гъили бувунни,
Бургъил тIинттал ппайрду тIий,
Марххала бассан бунни.

Ина ттулла, на вилла

Вих хьусса эшкьилул ттул бакI бур гьанай,
Ласун къабюхъайсса къалану чIалай.
Вих хьусса ччаврил мякь лиххан тIий бакъар,
Зам-замирал щинал нахIала буллай.

Вил янийн я щуни дакI тIутIайх дичай,
Асардал мугьали байщун бан къашай.
Вил иттав жавгьарду ттуршва жура шай,
На талихIрайн биян вил ца пиш гьашай.

Ттул мурччая лехлай, вил мурччай ликлай,
Мусил чIимучIалтту лагмава гьанай:
Ина ттулла, ххирай, на вилла, ххирай,
Ачу гьава банну ччаврил хъаттирдай.

ЧIиви къукъухьхьи

Бургъил мусил тIинтту зунттух кIучI хьунни,
Арив уртту-тIутIал къупру лавкьунни,
Лакьи яру, ххирай, ттул чIимучIалий,
Ттул ца акъа-акъуй, арцул гьайчалий.

Зурул чаннал пардав ялтту дуртунни,
ЦIурттигу ттуруллай шанан бивкIунни.
Лакьи, янил чаний, инагу яру,
КIукIлусса кIараллий бакIгу дирхьуну.

Марчгу бур уххай тIий, вин макьан дуцлай,
Кюрттаву чIелмулт бур шанул лях лаглай.
Шанашу, чIивитIуй, ттул чанна цIукуй,
Хъуна хьувкун ина, чаннайн уккивуй.

Мавихшав, бакъассар щяйтIан чувчIавгу,
Къабитайссар на му вичIан буххангу.
Уххай, ттул чIивисса кIяла къукъухьхьий,
Гьарнан ххуй дизайсса ттул къуппантIутIий.

КIюрх

Зунттухунмай ччех бивкIун,
Барзгу ккуру лавгунни.
НякIсса ссавнил куртIнивун
Бювкьун, цIуртти бат хьунни.

Зунзулчаннал къупругу
Дарардай хъяхъа кунни.
Бюхттулсса барзунтталгу
ЛахIу-тIитIу бувунни.

Бявкъу щаращал щинай
ТIутIал лажинт дирссунни.
Хьхьемал кIунтIал дюхлулий
Лелуххант чантI увкунни.

Чаннавух цIан дярххунни,
Гьаварал гьагь бивгьунни,
Архний зунттул мицIлиха
Бургъилгу пиш увкунни.

Ажарттулгу бюхттулну
Цилла макьан дурцунни,
АьнакIащал къудурну
Хъювух занан бивкIунни.

Мурчал хъярч

Мурчал мархь, галай бувну,
Май-мурччавух бивщунни,
Щил ссибизан бувссарив,
На баттан кьаст лархIунни.

Цива ци байрив ккаккан,
Зуманийнмай хьуссияв,
Ма вин зума увкуну,
Марщайх ккуру бивтунна.

Бачинна тIий, бизара,
Ца бивщуну, бутара,
Лихъанна тIий, хъит чара,
Хъирив багьну, бутара.

Тти хъяврин буванна тIий,
Ца чIирацIух бавцIусса,
БакIрая карщи ларсун,
Хъирив лечлачи бувра.

На мурчал хъирив шавай,
Марч ттул хъирив багьавай,
Цаннащал ца жу ччалай
Кьини дуссар лагавай.

Къари-бава

Бургъилу гъили буллай,
Къари-бава дур шанай.
Лагмара дуниялгу
Мугъаятну дур гьанай.

Жиг дартIсса симандалийх —
Лавг оьрмулул ххуллурду,
Карав дирхьу каруннайх —
ЗахIматрал щарш накьичру.

Акъар оьрмулул дусгу,
ДакIниймур бусанагу.
Дунияллул чувнугу
Утти аьсав дур хьуну.

Архну, бюхттул зунттаву,
Дуниялул гъунттулу,
Къари цинна цурдалу
Яхъанай дур пукьлуву.