Лакрал агьали, сайки хьхьичI бавкьуну тIиссакссагу, цала ппухълуннал миналия – зунттава арандалийн бизан бувну нанисса чIумал, 1944-ку шинал, Ккуллал шяравасса ГъазимахIаммадлул душ ПатIиматлун – ттул ниттил ниттин, диркIун дур дурагу шанна шин.
Щалла шяравалу дизан дурну къадиркIхьурчагу, хъуннасса Ккуллал шярава ЦIуссалаккуйн дирзун диркIссар 130 хозяйство. Миннул гьанулий цIусса кIанттай сакин дурнугу диркIссар цурдалусса, хIакьину жула цинявннал зума-мазрайсса, ЦIуссаккул тIисса шяравалу. Цивппа ккул бакъассагу, миккунма бизан бувну бивкIссар ялагу: Цалчинмур ЦIувкIрату – 35 къатта, Ваччату – 35 къатта, Хъювхъату – 25 къатта, ЧIяту – 35 къатта, ЦIущаннияту – 30 къатта.
ПатIиматлул ниттил Разиятлул цуппа рязину бизан гьуз учаврин хъунмур сававнугу хьун диркIун дур диялсса захIматшиврухун дагьсса ичIаллил тагьар: ласгу ивкIуну, арулва оьрчI-бакI цинмалу ччаннай бацIан буллан багьлай бивкIшиву.
ПатIиматлул хъунмур оьрмугу лавгссар ЦIуссаккулув. Гиккува ташулулгу хьуну, ванил лякьлуя бивзссар ххюва оьрчI. Цилами бакъассагу, ттул ниттил ниттил хъуни бувссар ялагу ятинталну ливчIун бивкIсса шанма оьрчI.
Сайки бусса оьрмулухун ПатIимат цинявннангу бусравну, кьадру-кьимат ххину зий бивкIссар ЦIуссаккуллал медпунктрай. Вагу бакъарив, туну, ца виричушиврул ххуллийсса оьрму. Укунсса хъаннил ниттихъал хъачIунттай бакъарив яхьусса жула тарих, талихI? Ди!
Декабрь зурул урчIилчинмур кьини ттул ниттил нину дурсса кьинир. Жул аьзизсса, дакъа чара бакъасса хъуннабавай, чIа тIий буру вин чIярусса цIуллусса кьинирду, цIу-цIусса ххаришивуртту. Яданнав ина Заннал.
Ванилла кьинилуцIун жу барча дуллай буру ца-кIива гьантлул хьхьичI кIицI ларгсса цинярдагу ниттихъал Кьини! Хасну жула лакку ниттихъалссагу!
ПатIиматлул душнил душ Аьйша Аьлиева
