Украиннал аьрщарай нанисса хасъсса аьралий операциялий къучагъну талай бур ЦIуссалакрал райондалиясса цикссагу жагьилтал. Билаятрал мурадру буручлачисса аьралитуран бувчIлай бур цивппа ссахлуну ва ссал цIаний талай буссарив.
СВО-лий гьуртту хъанахъисса жула аьралитал лайкь хьунни паччахIлугърал, ведомствардал ва жяматийсса наградарттан.
Аьралий бигарду къучагъну бартбигьаврихлу, вай гьантрай, ЦIуссалакрал райондалийсса ЦIуссаккуллал шяравасса Руслан Рамазанов лайкь хьунни 1-мур даражалул «За храбрость» тIисса медальданун. Къучагънан награда дуллунни Хасавюрт шагьрулул, Хасавюртуллал ва ЦIуссалакрал районнал аьралий комиссар Абакар Даудовлул.
Хасъсса аьралий операциялий гьуртту хъанай уссар Руслан цалчинсса гьантрая шийнай. Цувагу найунува агьну ур къизгъинну талатавртту нанисса кIанттурдайн.
1999-ку шинал Шамил Басаевлул ва Хаттаблул каялувшиндаралусса къачагътурал кьюкьри ЦIуссалакрал аьрщарайн ххярхсса ппурттуву, оьрмулул 19 шинавусса Руслан уссия буттал шяравалу дуручлай. Та чIумал, жагьилсса оьрчIан лявкъуну бивкIссар боевиктурал ярагъ ва боеприпасру. Русланнул нигьа къаувсуну, ярагъ цамур кIанттай лабивтун бивкIссар. Яла, цахьхьунма пурсат бирияйхту, боевиктураха лабивтуну бивкIсса ярагъ ополчентурахьхьун буллуну бивкIссар.
Хасъсса аьралий операциялий гьуртту хъанахъисса хIаллайгу Руслан нигь-ццах дакъа бартбигьлай ур аьралий бигарду, цала оьрмулун нигьачIаву дунугу, ххассал буллай ур щавурду дирсса гьалмахтал.
Укунсса къучагътал буссаксса ххувшаву ласунтIишиврийнсса вихшала хъиннура цIакь хъанай дур.
Ватандалул мурадру буручлачисса цинявппагу оьрчIру цIуллу-сагъну зана хьуннав цала кулпатирттачIан.
