Нюжмаркьини Ккуллал райондалийсса Бадави Рамазановлул цIанийсса ЧIяйннал школалий хьунни Учительтурал кьинилун хас дурсса «Школа в надежных руках: День самоуправления ко Дню учителя !» тIисса мероприятие. Ва кьини школалий кIулшиву ва тарбия дулаврил жаваблувшиву цала бакIрайн ларсун бия 10-11-ми классирттал дуклаки оьрчIру.

Мероприятие даврил мурад бия ларайсса тIалавшиннарду ва хъуннасса жаваблувшиву дусса учительнал захIмат-кьиматрай ва бусраврай бушиву тасттикь баву.
Школалий кIюрххилва хъуними классирттал оьрчIру бия учительтурал кунма, дуклаки оьрчIру хьунабакьлай, низам дуручлай.
Директорнал роль дургьуну ия Мирза ХIусманов. Ванал ххал бивгьуна дарсру дишин хIадурну бувсса кабинетру. Дуклаки оьрчIахь кIицI лавгуна низам дуруччин, кIулшивуртту ласунсса хIарачат буллан аьркиншиву.
Директорнал хъиривчунал роль дургьусса Аьйдамир Камиловлул бурж бия учительтурал расписаниялийн бувну дарсру дишаврил ва школалул жяматийсса иширттал даву сакин даврил ялув ацIаву. Дарсру дихьлай бия хъуними классирттал оьрчIру. КIицI лаган, ва кьинисса мероприятиялун хас дурсса дарсру дишин дуклаки оьрчIру нукIува хIадургу хьуну бувкIун бия. Байбихьулул классирттахь музыкалул дарс дирхьуна Караба Сулаймановлул. ОьрчIан ххира хьусса макьаннай балайрду тIий, цинявппа хIала бувхсса, тяхъасса дарс дирхьуна ванал. Аьлибаг Кьурбановлул математикалул дарсирай, задачарттан кIанттай бястру ва пикрирду буллан багьайсса мини-олимпиада дурну, цинявппа оьрчIру таза буккан бувна.
Географиялул дарс дирхьуна Сакинат ХIусайновал. Ванил дуклаки оьрчIру цала язи бувгьусса регионная презентацияртту дуллали бувну, куннал куннан кьиматру бишлай, дарсиравух цинявппа чялишну гьуртту бувна.
Аьйдамир Камиловлул дирхьуна «В редакторской мастерской» тIисса цIанилусса, текстраву ошибкартту ххал дуллалисса ва мунил мяъна-мурад кIул буллалисса оьрус мазрал дарс.
Физкультуралий Мирза ХIус­ановлул дирхьуна шахматирттал дарс.
Школалийсса низамрал ялув бацIаву цала бакIрайн лавсун, дежурныйтал хьуну бия Аьлибаг Кьурбанов ва Караба Сулайманов. Вайннал мурадгу, низамрал ялув бацIаву бакъассагу, тIул дакъашиву дуллалисса оьрчIахь насихIат бусавугу бия.
Ва кьини дуклаки оьрчIал учительтурал пишалул захIмат­шивуртту ххал дигьаву бакъассагу, барчаллагь увкуна кIул­шивуртту далаврил цIакьсса гьану бизлазисса школалул каялувчитурахь.
Лажин хIадур дурссар
Имара Саидовал