Цукунсса замана бучIарчагу, ци захIматшивуртту хьунадакьларчагу, цала пишалийн иман дирхьусса, оьрчIру ххирасса учительтурал къакьабивтунни школа, къалавгунни ми бигьану арцу лякъин шайсса, харжру хъунисса давурттайн. Цала оьрму оьрчIру тарбия баврин ва миннан кIулшивуртту дулаврин хас бувну, му ххуллий хъунмасса захIмат бихьлай, учительнал цIа бюхттул дуллалисса хIакьсса пишакартал чансса бакъар цалсса уттигу жула школардай. Мукунминнавасса ур Каспийскаллал 7-мур гимназиялул учитель Аьбдуллаев Амир ХIасановичгу.
Гьашину ванан оьрмулул 60 шин бартларгунни. Миннува чIяруми шинну оьрчIан кIулшивуртту дулаврил ххуллий гьан дурну дур.
Увну ур Амир ЧIяйннал шяравасса ХIасаннул ва Жариятлул кулпатраву. ЗахIмат ххирасса, цала дуллалисса даву лажин кIялану чулийн дуккан дайсса, увкусса махъ бацIан байсса ХIасаннул ва иминсса, дакI хъинсса, ласнал хIурматгу лавайсса Жариятлул тарбия бувну бур цала оьрчIругу ас-намус буну, захIмат ххирану.
КIулшивурттачIансса ххуллу Амирдул байбивхьуну бур 1972-ку шинал, та чIумал Каспийск шагьрулий яла машгьурмур 7-мур гимназиялий. 1982-ку шинал марцIну ххювардай мугу къуртал бувну, лахъсса кьиматирттай экзаменнугу дуллуну, увххун ур Дагъусттаннал университетравун. Ванан ччай бивкIун бур таржумачи хьун, мунияту чил билаятирттал мазурдил факультетрайн буллуну бур документру. Амма иш цамур куццуй багьну, филологиялул факультетрай дуклан кьисмат хьуну бур. Укун язи бугьан багьну бур бусравсса учительнал пиша. Ва микку аьркинну ивкIшивугу чIалан бивкIунни зий шинну наниссаксса.
КIира шинай дуклайгу ивкIун, Амир лавгун ур аьралий бурж биттур бан. Аьралуннавугу ванал ккаккан бувну бур цала даража тарбиялул чулуха бикIу, кIулшивурттал чулуха бикIу. Командиртурал ванайн тапшур дайсса дия жаваблувсса давуртту. Частьрава нитти-буттайн барчаллагьрал чагъарду бучIайсса бия. – Ванал цалагу нитти-буттачIан аякьалийсса чагъарду бучIайссия, – тIий, буслай бур вайннал чIаххул. Чув ухьурчагу лакрал цIа гьаз дансса, кIулшивуртту ва бюхъу-бажар бусса инсан ур Амир ХIасанович.
Армиягу лавхъун увкIун махъ, гихуннай цала дуккаву щаллу дуллан ивкIун ур. Ва увчIуну ур факультетрал комсомолданул комитетрал секретарьну, профсоюзрал комитетрал председательнал хъиривчуну, курсрал старостану. Амир чялишну гьуртту шайсса ия факультетрал жяматийсса давурттаву. Ванал дайва гьурттушинна СТЭМ-раву (студенческий театр эстрадной миниатюры), КВН-далуву.
1989-ку шинал университетгу къуртал бувну, Амир зана хьуну ур цува дуклай ивкIсса Каспийскаллал 7-мур гимназиялийн, оьрус мазрал ва литературалул дарсру дихьлан. Цимирагу шинай шикку зий, ванал ккаккан бунни цала гьунаргу, усттаршивугу, кIулшивурттугу. Ва ур оьрчIах ччаву дусса, миннал дакIнивун ххуллу ласун кIулсса, аякьалийсса учитель.Чансса бакъар ванал дарс дирхьусса, тарбия дуллусса оьрчIаву ва миннал нитти-буттаву уттигу барчаллагьрайсса. Амир ХIасанович ур коллективран бусравсса, дуклаки оьрчIачIа хIурматрайсса учитель. 1996-ку шинал Каспийск шагьрулий ва лайкь хьуну ур «Учитель года» тIисса бусравсса цIанин. Ва конкурсраву Амир ХIасановичлул Дагъусттаннай кIилчинсса кIану бувгьуну бур.
2012-ку шинал Амир ХIаса
ЗахIматсса 1990-2000-ку шиннардий чIявуми учительтал школардугу кьабивтун цала маэшатрай лавгсса чIумал, Амир ХIасанович авцIуна, оьрчIан кIулшивуртту, тарбия дулунмигу аьркиннихха тIий.
ХIакьинусса кьинигу зий ур. – Учительнал пиша яла бюхттулмурди, учитель оьрчIал дакIурдил хIакинни, – учай Амир ХIасановичлул. Укунсса учительтал чан къабаннав жула школардай.
Андриана Аьбдуллаева
