Февраль зурул 9-нний МахIачкъалаллал 11-мур гимназиялий хьунни «Лучший учитель родного языка– 2022» тIисса конкурс. Конкурсрал сакиншинначитал хьунни МахIачкъала шагьрулул администрация, КIулшивуртту дулаврил управление, КIулшивуртту дулаврил зузалтрал профсоюзрал комитет ва Р. ХIамзатовлул цIанийсса фонд. Пишалул магьиршиву ккаккан дуллалисса бяст-ччаллаву гьуртту хьунни республикалул школарттаясса 14 учитель. Конкурсрал программалийн бувну, учительтуран ккаккан дурсса чIумуй бусан аьркинну бия цаятува, дуллалисса даврия ва хьхьичI бивхьусса агьамсса масъаларттая.
Шикку гьуртту хьусса цинявппагу учительтал бия цаннаяр ца гьунар бусса, цала пишалийн дакI тIайласса, мазгу-миллатгу ххирасса, унгу-унгусса патриотътал. Гьашинусса бяст-ччаллаву гьуртту хьунни Ниттил мазрал дарсирдал ассоциациялул хъунмур, МахIачкъалаллал 16-мур школалул ниттил мазрал дарсирдал учительница Аьлиева ПатIимат ва шагьрулул 31-мур школалул ниттил мазрал дарсирдал учительница Жавгьарат Исяева.
![](https://ilchi.info/wp-content/uploads/2022/02/uchitel_nittil_maz1.jpg)
Аьлиева ПатIимат ва Жавгьарат Исяева
– Учительтурал пишалул даража гьаз баву мурадрай укунсса конкурсру баврия хъунмасса мюнпат буссар. Гьарица шинал вай конкурсирттаву гьуртту шайссар республикалул школарттаясса яла итххявхми ва гьунар буми учительтал.
На хIакьинусса конкурсрай лакрал чичу, революционер Гьарун Саэдовлул «Къалайчитал» тIисса пьесалуясса дарс дишав . Барчаллагьрай бура Республикалул КIулшивуртту дулаврил министерствалул педагогтурал даража гьаз баврил, ниттил мазру сахъла баврил чулухуннай дуллалисса хъунисса давурттахлу, – увкунни ПатIимат Аьлиевал.
Конкурсрал даву нанисса шанмагу гьантлий гьурттучитурал дянив най бия самопрезентация даврил, педагогнал концепциялия бусаврил, классный час дишаврил ва нитти-буттахъансса собранияртту даврил бяст-ччаллу.
Вайннал гьунардан кьимат бищун хьхьичIунсса педагогтурая ва пишакартурая хIасул бувну бия жюри. Конкурсраву чIалан бивкIунни учительтурал кIулшивурттал ва пишакаршиврул даража.
ХьхьичIсса кIива гьантлул хIасиллайн бувну, яла чIявусса баллу лавсъсса ххюя учитель увккунни финалданийн. Цинявппагу гьуртту хьусса учительтал бия гьарца чулуха итххявхсса, ххуйну хIадур хьусса, ттизаманнул тIалавшиннардахгу бурувгун, цала-цала кьяйдардай зузисса. Цала дарсирдай вайннал ишла дунни компьютердал технологияртту, кумаграл пособияртту ва дарс чIюлу дуллалисса лич1и-лич1исса материаллу. Конкурсрай хьунни тIуркIурду, викторинарду.
Шамилчинмур кьини хьунни конкурс лакьлакьисса мажлис. Дуклаки оьрчIал ккаккан дунни концертрал программа.
Ххув хьусса учительтуран бахшишру ва премияртту дуллунни МахIачкъалаллал КIулшивуртту дулаврил управлениялул отделданул хъунмур Зулгижат Аьвдулжалиловал, Ниттил мазрал дарсирдал центрданул хъунмур Марина ХIасановал, 11-мур гимназиялул директор Зугьра ЯхIияевнал, КIулшивуртту дулаврил зузалтрал шагьрулул профсоюзрал комитетрал председатель Александр Зайцевлул ва Р. ХIамзатовлул цIанийсса фондрал президент ХIабибат Аьзизовал.