Октябрьданул 5-нний щалагу Аьрасатнаву кIицI лагай Учительнал кьини. Лахъа-хъун бай оьрчIан тарбия ва кIулшивуртту дулаврил ххуллий хъунмасса захIмат бивхьусса учительтал-ветерантал ва цIана зузими. Учительшиву дан гьарнаща къашайссар.

Ва ляличIисса усттаршиву, ссавур ва жаваблувшиву аьркинсса пишари. Учительнал бияла хъунмассар жула оьрчIру тIайласса ххуллийн бичин, минная лайкьсса инсантал хьун. ХьхьичIунсса инженерналгу, строительналгу, цума-цагу пишакарналгу кIулшивурттал гьану школалийри бизайсса.
Бигьа бакъасса учительнал пишагу язи бувгьуну, цала ­оьрмулул хъунмур бутIа ва даврин хас бувну бур СунбатIуллал шяравасса Рамазаннул арс Муса Маллаевлул. ЦIана ванал ­оьрмулул мяйцIалла шин дур. Ва ур республикалийгу, райондалийгу ххуйну кIулсса цIанихсса уссал усттартал Маллаевхъал агьлу-авладраясса. Миннаяр хьхьичIмур ник му­ххал ххуллул пишакартал бивкIун бур. Мусаннив учитель хьун ччан бивкIун бур. СунбатIуллал школагу къуртал бувну, ва увххун ур Дагъусттаннал педагогикалул институтравун.  Школалий дуклакинива спортрал итххявхсса, физкультуралул дарсру ххирасса Мусал физкультуралул факультет язи бувгьуну бур. 1969-ку шинал мугу къуртал бувну, ца шинай зий ивкIун ур Огнилийсса 2-мур  школалий. Мунияр махъ аьралуннаву къуллугъ бан лавгун ур. 1972-ку шинал увкIун ур зун МахIачкъалаллал 1-мур школалийн.
ХхюцIалунния лирчусса шиннардий ва школалий физкультуралул дарсру дихьлай, Мусал хъунмасса захIмат бувну бур оьрчIан спортрах гъира бутан, вайннаву му чулухунмайсса гьунар ялун личин бан. Ва ивкIун  ур ОьрчIал ва чIава жагьилтурал спортрал школалул тренернугу.  Муса Рамазанович зузисса шиннардий ванал хIадур бувсса МахIачкъалаллал 1-мур гимназиялул дуклаки оьрчIал мудан хьхьичIунсса кIанттурду бугьайсса бивкIун бур личIи-личIисса спортрал бяст-ччаллаву. Ва лайкь хьуну ур Дагъусттаннал кIулшивуртту дулаврил, Спортрал министерстварттал ва цаймигу идарарттал чулухасса   ХIурматрал грамотарттан, Барчаллагьрал чагъардан. Муса Рамазанович ур Дагъусттаннал кIулшивуртту дулаврил отличник, Аьрасатнал кIулшивуртту дулаврил хIурматлувсса зузала. 
Школалул коллективрал ва дуклаки оьрчIал дянив ванал хIурмат хъунмасса бивкIун бур. Школа къуртал бувну шинну ларгун махъгу школалул выпускниктал Муса Рамазанович хIурматрай дакIнин утлан бикIай.
ХIурмат бусса Муса Рамазанович! Барча тIий буру вихь пишалул байран.
ЦIуллушиву дулуннав, вила кулпатрал, оьрчIал, выпускниктурал ххари уллай чIярусса шиннардий ттигу итаннав, ахир хайрданийн дукканнав.