МухIуттин Чаринов
ДакIнин багьаву
ЧIивинийсса эшкьий,
Ттигу чун дуркIра?
Ххуллу цукун лякъав
Ттул дакIнивн ина?
Ларгсса шадшивуртту
Щил дакIнин дирчур?
ЧантI учин щил буври
Щюлли хияллу?
Бавунни ттул вичIан
ХьхьичIва кIулсса чIу,
Пар увкунни янин
Пар-партIи симан.
ДакIний хIасул хьунни
Ххирасса тIутIи.
Циняр ларг кьинирду
Ттул хьхьичI дарцIунни.
Агь, ххирасса хъамал –
Ларгсса кьинирдуй,
Ттул хIасратсса дакIнивн
Зу чун най дуру?
Бюхъайссарив ттуща
Хьул уттава бан?
Бургъил лагма нани
Дунъял дацIан дан?
Кьавкьун лавг хияллу
ТIутIайх бичин бан?
Бюхъайссарив ттуща
Хьул уттава бан?
Юсуп Хаппалаев
Ина уча
Циван бура зукьлай,
Ттун хъинбала ччай?
Ина уча ттуха
Цамур ччаврил зай.
Уча, на ччуччиннав
Мурадрал цIарай,
ХIаллил хIави куна
Ссут дайдихьулий.
Уча, на оькьаннав
Ччаврил хьхьиривун,
Хьхьирил хIава куна
Гъи дайдихьулий.
Уча, на ласуннав
Эшкьилул мурчал,
Гъарал ттурлу куна
Инт дайдихьулий.
Циван бура зукьлай,
Ттун хъинбала ччай?
Ина уча ттуха
Цамур ччаврил зай.
Уча, на аьтIуннав,
Дустал шад хьунну.
Так жува къаччинал
ДакI пашман хьунну.
Мирза МахIанмадов
* * *
На вийн хаин хьуссар тIий,
Ххирамур, вихь щил бувсри?
Циван буракьай аьтIий,
Вих машара, щялмахъри.
Бувсхьурча му вихь бургъил,
Баргъ ттуруллул бугьаннав.
Бувсхьурча вихь цIузурул,
ТакIуй ккуркки къахьуннав.
Агар вихь му бувсхьурча
Энадрай чIаххувдушнил,
Зайгу къаучиннача,
Къабуччиннав цув ччаврил.
Бадави Рамазанов
Бяъли бахху
На бавал базаллувун
Бурчахъ ласун гьан увнав.
На тIурча базаллува
Бяъли лавсун увкIссияв.
Базаллув бяъли бахлай
Ца аьнтIикIа ккавккуна,
Яру батIин къабюхълай,
Бурчахъ хъамариртуна.
–Бяъли ласун ччай урав?–
АьнтIикIал суал бувна.
КIаншгу дурну, на учав:
–ДикIанссар, кило дуца.
На, бяълигу цIупIа тIий,
Базаллува авчура,
Аман, цIупI чин хьурдай тIий
Бяъли баххул мурччая.
На бавал базаллувун
Бурчахъ ласун гьан увнав,
На тIурча базаллува
Бяъли лавсун увкIссияв.
Ххишала базаллувун
Бавалгу гьан къаара,
Бяъли баххух ябитан
Баваха кьюлтIну гьара.
Абакар Мудунов
* * *
Ина ттухь увкуна хьунабакьинну,
Дараччи лирчукун бярнихсса гьанав,
Ялагу увкуна хъатIи буванну,
Ччиккул ччиккув кувкун щюлли гьандарав.
Ччянира хъякунни гьанав дараччи,
Вил чурххал ххютрагу янийн къарщунни,
Цакьнийва бавунни ччиккул балайрду,
Буллу мукъуй бацIан вища къавхьунни.
Ци бави, яхI банна кьурукь букканнин,
Мусил къурув хъанакI ятIул лаганнин,
Ссавурданул кIини чантI учин баннин,
ЦIарал кIалай хьуну, ччаву лехланнин.
Абачара ХIусайнаев
Ччива ттунгу, ччарча вингу
КIюрххил зунзулчаннал ттюнгъасса тIинттал
Буккан бай мусил пар барзунттал бакIай,
Ччива ттун кIайннуйгу тамаша буллан,
Бюхъарча вищагу ттух эшкьи дуван.
Зунттал хьхьемал кIунтIру кисаран чIапIай,
Бирлиянтру кунма, пар-пар тIун бикIай.
Ччива ттун кIайннухгу савдалул ччучлан,
Хьурча вищагу ттух эшкьилул ччучлан.
Бярдаяр дунъяллий хьхьирирду куртIри,
Хьхьирияр ттул дакIний вих эшкьи куртIри.
КуртIшиврул цибави, талихI аьркинни,
Ттунуксса вингу ттух ччаву аьркинни.
Аьбдул Мирзаев
Инт
ЧIал къавхьуну зунттал душ
Чалагъай дутлантIиссар,
Чалагъайлул хъаттирдай
Душ хьхьичIух лехлантIиссар.
Шагьрурдая щархъавун
Жагьилтал букIлантIиссар,
ЧIал къархьуну шаллугу
МарцI ницIал дуцIлантIиссар.
ЧIал къавхьуну хъуруннай
ЧIаллугу буцIлантIиссар.
ЧIал къавхьуну багъраву
Ахъулсса диллантIиссар.
НакIлил бувцIу гъадарттал
Ялув барт дихьлантIиссар,
Бюрчулил мурччацIагу
Урттул кьанкь ришлантIиссар.
Щюлли хьуну буруча,
ЧIал къавхьуну ухьхьу тIий,
Щакъалиххай зунттурду
Ттуйн ялун бихьлантIиссар.
Аьли Айдаев
Аьзизмур
Бюхъай цаманалгу вихь куну бикIан:
«Аьзизмур, ххирамур, дула ка ттухьхьун».
Бюхъайхха цамагу булун ччай икIан,
На куна, тIутIал кацI, аьзизмур, вихьхьун.
Аьй-бювкьу къадара «аьзизмур» кунай,
Мяшра, валлагь, мяшра вин сан хьуманай.
Хьул чин, хьурдай учин гьарнан бучIиссар,
Так кьимат кIулманан тIутIи хIалалссар.
Ява, ка дулуннин дакIнивун бургу –
Мякь бурив дакIниву, юхссагу ччаву.
Ява, ка дулуннин канивун бургу –
Чул бищунсса кьуват бурив каниву.
Мякьгу лиххан бувну, лагай ххуллулсса –
Ява, ххуллулссаннайн бакIрайн къабагьан.
ТIутIал ар ккуччу дай айгъурчал ччаннал –
Ччаву ххай, гьавасрал хъяврин къабуван!
МахIаммад-Загьид Аминов
Жанжувалухьсса личIаву
Цими гьанттар, цими хьхьур
На янийн я къалакьлай…
Ялугьий бур… аьтIий бур,
Хьулухату къалаглай.
О-гьай… личIи хьун багьний,
Махъ бикIайссар ччаврия,
Байбихьула, ттул чаний,
Жува хIала шаврия…
ХIала бувхссар яругу,
Жува цачIу бавцIуний.
ХIала дурхссар каругу,
ЦIаннай хьунабавкьуний.
Гьарца пишгу, агь-угьгу,
Гьимгу дурчIлай найдуна,
ХIала дурхссар дакIругу,
КIира тIутIул кьанкь кунна.
Агь, ттул ччавуй, ттул ччамар,
Ттул яру ва ттул вичIив,
Дагу-дяъвай лас ва щар
Цукун шайривав личIи?
Буллунавхьур ва суал,
Жаваб дулунна вихьхьун:
Валлагь, тти, ивчIаннияр,
Жапа хьунссар личIи хьун!
Адам Адамов
* * *
На бюхттулну лехлан
Барзу акъаяв,
Вих эшкьи хьуну махъ
Ттуй хъару хьунни.
Шавкьирай балай тIун
Булбул акъаяв,
Вих ччаву хьуну махъ
На аьшукь хьунна.
Ва ттул дикIул дакIгу
Марша дакъая,
Ина ххал хьуну махъ
ТIутIайх дирчунни…
Барчаллагь тIий ура
Вил нитти-буттахь,
Ина кунмасса душ
Хъунма бан хьусса.
ХIасан КIурухов
Ххирамунихь щурщулий
Мачча хьусса мурччив, дус хьусса дакIру,
Зурул нур ва зурзу, магьри ва макIру.
ЦIурттахь дур ардугу, цIурттахь дур ссавгу,
ЦIуртталли вил симан чанна дурссагу.
Чанна хьунни, ххирай, ттул дардругума,
ЦIурттал чанна дурсса вил симан кунна!
ХIаз бур ттун хIакьину вил мурччай аслан,
Вил базурдал балай мякьну лаласлан.
ХIаз бур вил кIизувух кIисри ччех битлан,
Вил иттав уруглай, маз хъамабитлан.
Цири шярал тIарду, цири дазурду –
Бюхттулну гьан данну вай жула хьхьурду!
Даниял Магьдиев
* * *
Къюнари бувцIуну щаращул щинал,
ХIачIлай бияв ина, на хIайран уллай.
СсихI кунма чаннасса сунттул гьухъувух
Магьилул кунмасса чурх бия чIалай.
Ца-ца кIунтI иминну ккуру лагайва
КIюласса ссурссулийх, арцул пар куну.
Яла бакъа шайва вил хъазамраву,
Хъирив ттул хъазамгу бавцIлацIи бувну.
Бюхъай ттул умудру нахIакьсса лякъин,
Бюхъай вихсса мякьгу тачIав къалиххан.
Щукру ина ккавксса марцIсса щаращуй,
Ина дуллу щинал мякь лиххан буван.
