Шяраву хъатIи бия

Ччясса ссутнил чIун дия
Аьзиз буттал шяраву.
Шяраву хъатIи бия,
Ттуйн хъатIийн оьвтIий бия.

ХIадур дуруна ниттил
Ттухьхьун бухчакарщигу,
Дурккуна буттукьрава
БакIрайн рутан меччахIгу.

Кьариртун чалагъайгу,
ЧIарав бухчакарщигу,
Лавсун мюрая мухIгу,
Бавчура къатлувату.

— Чунна, — увкуна ниттил, —
МухIгу кIунттил бувгьуну.
ХъатIийн гьай чIаххув душру
Вихва ялугьланссархха?

— Маялугьларди, уча,
Аьзиз чIаххув душварахь.
На ца кIуриялу дан
Къурув най бура, — учав.

Хханххираву цIаращал
Бувкра щарнил зуманив,
Иттав виримукьащал
Занан бивкIра маршравух.

Бувкра лачIал хъуничIан,
Щиллив ттихIлай кьариртсса,
Ттуйва бияла бакъа
Зун бивкIра мухIиращал.

ЧIюх увкуна архния
ХъатIул зюннав-накьара,
Бишлан бивкIуна иттах
Ттул канилусса чIаллу.

Баргъгу заваллай бавцIун,
Хъу дачIи хьусса чIумал,
Ялун дируна къари,
ГьарацIигу канихьну.

— Ттул душ, ина ча багьра,
Ци лайлатул кьадрира,
Кару дякъил дургьуну
Гужрай зий дуссиявхха?

— Ниттилссуй, хIакьину ттул
Гьалмагъай ивкIу кьинир…
— Ттул душ, та дяъвилуву
Ттулмагу ливчIссар, — куна.

Гьалмагъайх дягъулул макь –
РутIарду кIиннилагу,
ТартнакIлил гьарацIигу
ХIачIарду кIиннилагу.

Шяраву хъатIи бия,
Къургу вичIилий бия,
Ца ттихIлай, ца къав бахIлай –
КIира дягъугу дия.

Гъази-Гъумук кIи дур тIар

Гъази-Гъумук кIи дур тIар,
Марххалтту буллай бур тIар,
СсурхIиял Аминатгу
Хъун бярних къавтIий дур тIар.

Нисирай ччатIру буллай
ЧчютIухъал Жари дур тIар,
Дуссухун ссигъри буслай
Гьухъаллал Кусу дур тIар.

Шадну бур тIар ВацIилу,
КIяла варсигу лавххун,
Занчру ттиликIрах бивтун,
ХъачIниха баргъ гьаз буллай!

Бургъил дурцIу кIи дур тIар,
КIичIирттаву зяв бур тIар,
КIурунна бакIуйх оьрчIру
Гъуннарду дуллай бур тIар.

Аьзил зилув чяр-чяр тIий
Замзамирал щин дур тIар,
Щирпилул цIу пачливу
СсувхIатру буллай дур тIар.

Инагу, нагу царув?

Агь, ттул гъумучири оьрчI,
Инагу, нагу царув,
Инагу, нагу царув,
Ца ххуттан хIисавссарув?

Ттул кIяла хьусса бакIгу,
Ина хIайплий кIицI бунни.
Талайнмасса оьрмугу
Вихава лащан бунни.

Ттул ххуллия, ччаврия
Ина хIайплий кIицI бунни.
Талайнмасса оьрмугу
Вихава лащан бунни.

Ттул ххуллия, ччаврия
ХIучI увкусса вил дакIгу,
Уссурссуннан кьамулсса
ЧIа къаку вил мурадгу.

Чил хIасратрай дакI къацIий,
КIяла къархьу чIарарду,
Кьадаршиврущал талай,
Аьйплу къархьусса жангу.

Бюкь хьуну къума ратIух
Ивщунугу къалавгсса,
Хъару хьуну ссурулух
Лехлангу къабиривсса…

Ядуллалимур личIай,
Ччучлачимур къуртал шай,
Агь, ттул гъумучири оьрчI,
Вийгу ттул дакI мяш къашай!

Ккурккуллал Щазахь

Ттул ссу, Ккурккуллал Щазай,
Буния вил заманнай,
Рязиссияв на занан
Вищал ччергъилу ришлай.

Вил мукъурттил ттеркьукьив
Ца щяв дагьан къаритлай,
РатIлавияв вил хъирив,
ДакIния хьхьири буллай.

Вилгу, ттулгу кIира дакI
КIиннивурагу ца дард.
КIива заманнул оьрму
КIинниллагу ца касму.

Ччавугу, шеърирдугу
Кьюкьалалун бивхьусса
Заманалущал талай
Чайва тIар ина балай.

БакIрай кIяла чалагъай
Ттун кьисматрал дуллусса,
ХIайп чара вил заманнай
Вил макь лишин къадиркIсса.

ХIакьину ина хьурдай
Цал бурган бан махъунмай,
Наницири вил хъирив,
Вил ххуллу бюхттул буллай!

Ттул ссу, Ккурккуллал Щазай,
Буния вил заманнай,
Ххариссияв на занан
Вищал ччергъилу ришлай.

Ттул язи бувгьу гъалбарцI

Ттул язи бувгьу гъалбарцI,
Шеърирдавува ливчIсса,
Ивзун кIяла чIапIая
ЧIарав ацIан къавхьусса.

Кувннал вил цIа-бакI цIуххай,
Кувннал ккаккан ччива чай,
Кувгу ттухь пиш увкунах,
Щак тIий, хъирив буругай.

Эшкьи хьунал чагъарду
КувнначIан кувннал чичай,
Ччаву хьунал балайрду
Цаннаха цаннал учай.

Я вил эшкьилул чагъар
Итталун къабагьунни,
Я вил ччаврил шеърирдал
ДакI гьулусан къадунни.

Кувннал вил цIа-бакI цIуххай,
Кувннал ккаккан ччива чай,
Лухччи-ссавнийх вих луглай,
Ттула буна оьрму най.

Ттул язи увгьу гъалбарцI,
Шеърирдавува ливчIсса,
Ивзун кIяла чIапIая
ЧIарав ацIан къавхьусса.

Ссавурданий ливчIунна

Къатлуву паракьатну
Даврихух лавгун буна,
Ца гьаварал гьаз бувну,
Ларзулун буккан бувнав

Ххяххабургъийн дирхьусса
Буттахъал бюхттул ларзу,
Гъумучи хъатлий бихьлай,
Ккаккан буллан диркIуна.

«Та цуривав?» — увкуну,
ПаччахIххуллийн бурувгсса –
Асарданул чIатIаракI
ДакIнил куртIнивун щуна.

ПаччахIххуллу бувгьуну
Ина ияв авурну.
Тти Гъумучи къабувчIлай,
Лагма-ялтту уруглай.

«Ина шия лавгун махъ
Жул сий зия хьуссар», — тIий.
Гъумучиял кIичIиртту
Вихь бия зума цIухлай.

«Вил ша къабуххай хьуну,
Жулгу авур ларгссар», — тIий.
Буттахъал дарвазартту
Буллай бия бювкьурду.

Вил шаттирах мякь хьусса
Ина гьаз шай ВацIилу
Урттун тавт жегъир ххуллу
Янилун бутлай бия.

КIяла хьусса ттул чIантIив
Архния щурщу буллай,
«Жу кIяла шаврил тахсир
Вийгу хьуссар», — тIий дия.

Щюлли заманнай кунма,
Къабувкра на вил хьунийн,
Жагьил шиннардий кунна,
КъарутIав кIирисса макь.

Ссавурданий бавцIусса
Шагьру Гъумучи кунма,
Ссавурданий ливчIунна
Нагу бюхттул ларзулу.

БучIанна

Ттун ххал къашайнийх бур
Вил аьрххи-ххуллу,
Дустурал хъин итлай,
Гъаннал вив ласлай.

Бакъара вил иттав
На къала хьун ччай,
Акъанагу тачIав
ДакIния уклай.

На вичIан бучIанна,
Ина ккашилни,
Циняв ччатIул дустал
Тий-ший бавцIуний.

Ххари ан бучIанна,
Ина пашманний,
Нажагь вил дакI ссалчIав
Азурда дурний.

Кумаг бан бучIанна
Ина заэвни,
Оьрмулул щатIащал
Гуж къалаяйни.

Вил иттав бакъара
На къала хьун ччай,
БучIанна ттула ша
Вин аьркин хьуний.

Цумари къааьйкьусса?

Азарда ахIмакьшиву
Дурссар на оьрмулуву
Ттуяр чансса дурминнал
КIисри гьаз буллалира.

Букки байчу къавщуми,
СсахунчIав къабахчуми,
Оьрмулуву бяйкьуми
АхIмакьшиврун бишайми.

Вай оьрмулул щачIантту,
Ла-ялавай нанисса,
Кув гайннуйх лавай лахълай,
Кув ялавай бучIлайсса.

Ялавай бучIайнавух
Навагу хIалассара,
Бахтти бакъанал хIасрат
Нарагу дурхIуссари.

Къааьркиннайн умудгу,
Къадайнайн вихшалагу,
Цимил хъяврин хьурчагу,
Дурссар оьрмулув нагу.

Оьма утан кIаланггу,
Хъинма гьаз ан зунттугу,
Дунияллул гъунттулу
Къалявкъуссар ттунмагу.

Къатта ливсса къазахъчу,
Базар ливсса савдажар,
Ятту ливсса удаман,
Нагу зул гьалмахчура.

Мудан хъугу дюрхъусса,
Мудан залгу авкьусса
Оьрмурду дунияллий
Щихьхьунни бирияйсса?

ДакIнил хIал

Дарзий, ина магьирсса
СсихIирчира чивияв,
Буруххарчан ца гьухъа
Ттул ччавриха лавхьхьусса.

Уссал усттар цIа дурксса,
ЦIанин мукIру хьувияв,
Царай усру дуварчан,
Ттул дакIнил бущи бусса.

Бюхттул зунттай щютIуххий,
Баргъ ва барз къавтIунссия,
Дуцирчан ина макьан,
Ттул дакIнил такьва дусса!

Ва дуниял чархри

— Да Муккурдал Аьвдуллагь,
Цума ур, цума акъар,
КIа ттул ниттил шяраву
Цими къатта ливчIун бур?

— КIа вил ниттил шяраву
Цавагу къатта бакъар,
Шяраваллил агьлугу
КIани-кIанттайх бивщун бур.

Ятту-гъаттара ччинан
Ххаллилсса бизантту бур,
Миннун лазуни ччинан
Урттун хьусса лухччив дур.

Нувщи-къама аьркиннан
Шярахра хъурурду дур,
Зам-зам щинах мюхтажнан
Чяр-чяр тIий щаращив бур.

— Цан кьабивтссар, Аьвдуллагь,
Халкьуннал цалва алжан,
Ци савав, ци багьана
Хьуссар кIичча бивзун гьан?

— Хъудугьул сий дагьуна,
Дурккучунал гьаз хьуна,
Хъу-лухччинул бияла
Хъудугьуща зевххуна.

-ХьунтIиссарив, Аьвдуллагь,
ГъалатI тIайла бацIан бан,
Буттахъал минардачIан
Халкьру кIура баен бан?

— Ва дуниялгу чархри,
Оьрму гьанай нанисса,
Инсангу ххуллулссари,
Увкнийн кIура аяйсса.