[dropcap]В[/dropcap]ай гьантрай жул коллега, НТВ-лул тележурналист Оьмар МахIаммадов Арктиканавунсса аьрххилий уссия. Тихун ачин хьхьичIгу, ванал цала оьвкуну,

бувсуна «Илчилул» тарих дунияллул ух­ссавнийнгу лавсун гьан ччисса хиялданий ушиву. Жугу, анавархъиндарай жула логотипгу дусса ттугъгу хIадур бувну, ледоколданул моряктал бизар къахъанан, цаппара кказитругу хIадур бувссия ванащал тIайла буккан.

---

Залму АьбдурахIманова
— Арктикалийн, дунияллул ух-бакI­райн, та-унугу навагу агьанссарахха тIисса хиялданийвагу къаикIайссияв. Ттухьва: «Билаятрал ухссавнил чулийнмайсса аьрххилийн ччивав ачин», — куну цIуххайхтугума, ваца нава зуруйн тIайла уклакисса куна, цIубакIрай аьжаивгума хьуссияв, -тIий ия Оьмар жучIан ттугълил ва кказитирттал хъирив увкIни.

Гихуннайсса жул ванащалсса дахIа­вугу дия социал сетирдал кумаграйнусса. Интернет ххуйсса дакъахьунссия, Мурманскгу кьабивтун, Чукоткалия Ухссавнил Ледовитый океандалувун бувхсса вайннал ледоколдания цаппара гьантрай цичIав хавар бакъая. Ахиргу, августрал 17-нний, Оьмардуя дуркIуна Арктикалул ганз микIирай «Илчилул» логотипгу дусса ттугъ бивщусса суратру.

Вай аьрххилийн бувксса «50 лет Победы» ледоколданул капитан Дмитрий Лобусовлулгу Оьмардущал тIайла бувксса «Илчилий» цала чулухасса тIайлабацIу чIа тIисса махъругу чивчуну, Дагъус­ттаннайн цIунилгу хъамалу учIан ччисса хиялданий ушивугу бувсун бия. ЖучIана цалчин (Дарбантлив ва МахIачкъалалив) Дмитрий увкIун ивкIун ур 1989 шинал.

[dropcap]В[/dropcap]ана укун архсса ссапарданий тIайла бувксса хьунни жул ттугълил цалчин­сса аьрххи. Умуд буссар, ванияр гихунмайгу жула кказитрая буслансса ва машгьур буллансса ва аьдат дачин дурну, билаятрал цайми регионнайнгу тIайла бук­лансса.
Оьмар, барчаллагь вин, вийнма лавсъсса махъ бацIан баврихлу! Вин давривугу, оьрмулувугу тIайлабацIу хьуннав.
Шиккува кIицI буван, уттими «Илчилул» ттугълил аьрххирду Аьрасатнал дазурдайсса Камчаткалийн ва Калининградрайнссар. Вайгу Оьмардул сипталийсса эстафеталувух гьуртту хьун ччи­сса жул буккултри. Бусанну вайннаягу гихунмай.
Барчаллагь миллатрал кказитрахсса къулагъасрахлу зунгу, жунгу. Кабакьиннав, цаннан ца чан къабаннав!