Уттигъанну ТтурчIиял жяматрал делегация бувкIунни Лакрал райондалийн. Бусравсса хъамал кьамулгу бувну, вайннал дакIниймургу лалавсунни Лакрал райондалул бакIчи Юсуп МахIаммадовлул. Хьунабакьаврил мурад бия 1944-ку шинал Лакрал ва Ккуллал районнайсса цаймигу шяраваллавух жямат бизан бувсса ТтурчIиял шяравалу Дагъусттаннал культуралул ирсирал объектирдавун дагьан даву.
ТтурчIиял жяматрал вакилтурал тавакъю бувна райондалул бакIчинахь ва масъалалун кабакьу бан. Юсуп МахIаммадовлул хъинчулий ккавккуна вайннал сипта ва райондалул администрациялул чулуха чирчуна хасъсса обращение Дагъусттаннал культуралул ирс ябаврил агентствалийн. Чагъарданий кIицI лавгуна ТтурчIиял шяраваллил тарих аьвзал заманная шихунмай нанисса бушиву. Мунин барашинна дуллай бур 20-мур ттуршукулул дайдихьулий археологтуран шяраву лявкъусса нукIузаманнул ярагъуннил. ЦIанасса чIумал ми Санкт-Петербурглив ПаччахIлугърал Эрмитажраву ябуллай бур. Му бакъассагу, хьхьичIрасса ТтурчIиял хIатталлив тарихчи Ильяс Къаяевлун лявкъуну бур Гъази-Гъумучиял хантурал кIалабарзру. Дагъусттаннал тарихрава жунма кIулли Дагъусттаннал халкьуннал Надир-шагьлущалсса агьаммур талатаву ТтурчIайнна-зунттуй хьушиву ва микку жула халкьуннал душман ххит увшиву. Бусаларду бур шикку Надир-шагьлул цала хъямала дурсса арцу-муси ладиртшиврия. Миннуйн тамахIрайссаннал ТтурчIиял зумакъирагърайсса кIанттурду мудан бихлай бур. 80 шинал лажиндарай леркьсса ТтурчIиял шяравалу ва лагма-ялттусса кIанттурду щилчIав ябуллай бакъар. Шикку канаки буллай бур ятту-гъаттара, дихлай бур аьрщи, занай бур туристътал, шяравалу чапал дуллай бур.
Вай гьарзат кIицI лавгун бур райондалул бакIчинал агентствалийнсса хасъсса обращениялий. Вайксса шинну ларгун дунугу, ТтурчIиял жямат ччя-ччяни бияй кьариртсса шяравун. ХIарачат буллай бур кIиккусса къатри ядан.
ТтурчIиял жяматрал цIания Юсуп ХIамидовичлухь ва мунал хъиривчувтурахь дакIнийхтуну барчаллагь тIий ур Зайнулла Мирзоев. Жяматрал мукунма барчаллагь увкуна Ибрагьим Мирзоевлухь ва пикри дакIнингу бувтун, гихунмай ци зунссарив бувсъсса.
Андриана Аьбдуллаева
