МахIачкъалалив, Дагъусттаннал педагогикалул университетраву, хьунни «ХХI-мур ттуршукулул нину-ппу ва оьрчIру. Цаннал хьунийн ца»(«Родители и дети ХХI века. Навстречу друг другу») цIанилусса форум. 

Ванил сакиншинначитал бия Дагъусттаннал педагогикалул университет, Дагъусттаннал элмулул ва краеведениялул центр, Жяматийсса палата, Дагъусттаннал бакIчиначIасса Хъунилсриннал совет, МахIачкъалаллал Депутатътурал мажлис, Аьрасатнал халкьуннал ассамблея, Юстициялул министерствалуцIунсса жяматийсса совет.
Форумрай гьуртту хьунни паччахIлугърал структурардал, Муфтиятрал ва жяматрал вакилтал, аьлимтал, студентътал.
Мероприятие дачин дурну бия биологиялул элмурдал кандидат, кафедралул доцент Венера Разаханова.

ХХI-мур ттуршукулул нитти-буттал ва оьрчIал арардал хIакъиравусса, ттизаманнул кулпатирттал масъаларттаясса ихтилатру бунни ДГПУ-лул проректор, филологиялул элмурдал доктор Ибрагьим Дибировлул, Дагъусттаннал юстициялул министрнал хъиривчу Рабият Закавовал, Дагъусттаннал Жяматийсса палаталул председательнал хъиривчу, «Жизнь без слез» тIисса жяматийсса организациялул каялувчи Аьйшат ХIамзаевал, педагогикалул элмурдал доктор, профессор ЖахIпар Маллаевлул, психологиялул элмурдал доктор, профессор МахIаммад Далгатовлул, экономикалул элмурдал кандидат Ислам МахIаммадовлул, педагогикалул элмурдал кандидат, социал педагогикалул ва психологиялул факультетрал декан Диана ХIасановал, педагогикалул элмурдал доктор, профессор Бика Аьлиевал, педагогикалул элмурдал кандидат, доцент Раиса Сулаймановал. Аьлимтурал, кIулшивуртту дулаврил ва тарбиялул пишакартурал ихтилатру бия захIматсса тагьар дусса кулпатру ччяни ялун личин баврия, социальнайсса ятиншиврия, оьрчIал ихтиярду дуруччаврия. Ихтилатчитурал бувсунни Дагъусттаннай мушакъатшиву дусса оьрчIру ялу-ялун чIяву хъанай бушиву, мукунсса оьрчIру тарбия буллалисса нитти-буттан хъинну захIматну бушиву. Ихтилат хьунни оьрчIру баннин нину-ппу цала цIуллу-сагъшиврул тагьар ххал дуллай бакъашиврия, мугу мушакъатсса оьрчIру дунияллийн буккаврин савав хъанахъишиврия.
Аьйшат ХIамзаевал бувсунни МахIачкъалаливсса аькьлу-кIулшилул махъун багьсса, цIуллу-сагъшиврул мушакъатсса оьрчIру бусса центрду бувцIуну бушиву, цIуну буллалисса центрдавун бучIан ирглий бавцIумигу чансса бакъашиву. Цала ихтилатраву ЖахIпар Маллаевлул кIицI лавгунни республикалий мушакъатшиву дусса оьрчIащал зунсса профильный идарартту диялну дакъашиву.
– Мушакъатсса оьрчIру бусса нитти-буттан хъинну захIматну бур. Мунияту цаппара нину-ппу ми хасъсса идарарттайн буллай бур, оьрчIру нину-ппу сагъну бунува ятинтал хъанай бур. Дагъусттаннай мукунсса ишру хъинну чансса бур. Жула хъаннил мукунсса оьрчIру кьабивтсса ишру нажагьсса бикIай. Буттахъуллив укунсса тагьарданий хъаннин кумаг бан, чансса дунугу хъар лахъан ччай бакъар. Мукунсса оьрчIах буругавриву, ми тарбия бавриву гьуртту хъанай бакъар, – увкунни Маллаевлул.Социал ятиншиврия (нитти-буттал оьрчIру кьабитаву) ва мунил сававрттая бувсунни МахIаммад Далгатовлул.
– Нину-ппу личIи хьусса ишру чIяву хъанай бур. Му дур социал ятиншиврул хъунмур сававгу. Му бакъассагу, нитти-буттал кьабитлай бур оьрчIру къушлил ахIвал-хIал кIюласса бушиврийн бувну, – увкунни ванал.
Сайки циняв ихтилатчитурал кIицI лавгунни школалул психологнал бияла, чIурчIав дунни вай масъаларттал ялув зунсса циняв ведомстварттал вакилтурая хьусса цасса къуллугъ сакин бан аьркиншиврий.
Форумрал гьурттучитурайх бавчIунни Ислам МахIаммадовлул итабавкьусса оьрчIалгу, нитти-бутталгу буржирдая ва ихтиярдая бусласисса кIюласса луттирду.
Пленар заседаниялия махъ секциярдал заседанияртту хьунни.
Андриана Аьбдуллаева