[dropcap]Б[/dropcap]ур лавгсса заманагу дакI­ния гьан къабивтун, цала нитти-буттахъал рухIру паракьат хьу­сса шяраваллаву яхъа­нахъисса ватанчитал.Лакку билаятрал тIин-тIааьн оьттувува дусса инсанталну хъанай бур Чакъаллал шяраву яхъана­хъисса ХIусайнов МахIаммада ва ванал кулпат Зумрут.

ХIажимурад ХIусайнов
Ахир-зума дакъасса хаварду бикIай Ла­кку билаятрай яхъанахъисса инсантал цалнияр цал чан хъанахъаврия. ХIукуматрал жува хъамава-бивтун буру учингурив ттуща къахьунссар. Чанну духьурчагу райондалий хъанай дур да­хханашивуртту. Амма на муданагу вихссара ца инсаннащагума шайшиву чIярусса давурттив дуван, цала дакIниймур бакIрава гьан къабивтун, ахирданийн буккан бан. Мукунсса дакIниймур бартбивгьусса давуну чIалан дикIай ттун 2-мур ЦIувкIрав цала буттал шяраву, МахIрамов Аьвдулмажидлул дурсса давурттив.
Ванал дурмунияр мискьалданул яларайсса давуну дакъар Чакъаллал МахIаммадал ва ванал кулпатрал Зумрутлул дуллалимургу. Дуниял гьанай дур. Гьарца дунияллул «мурцIув» бур цала-цала буруккинтту. Жула лакрал бур ва иширацIун бавкьусса учала: «Гьарца каснан цала дард, гьарайзунан — щинал дард» — тIисса.
Ялагу, кказитрай чичайсса ттула макьаларттаву на чIун-чIумуй дакIнин бутлай, мисалданун буцин багьлан бикIай укун­ссагу ца иш. Тасса-тарив Мисриллал пиръаьннал цала канилусса жугьутIнал халкьуннай ххисса къия дуллай ушиврийн бувну, гайннан лихъан багьссар тIар ганачIату. Луглай-луглай къатта-къуш буван­сса кIанттурдах, къаляхълай бивкIун бур. Яла, чара бухлавгун, гана га цIана цивппа яхъанахъисса аьрщи язи дургьуну дур. Га цурдагу бургъил ччуччин дурсса, чIучIиндалул рангирайсса аьрщи диркIссар. Гикку хьуссар гайннал мина. Хьуссар гания «Земля обитаванная».
Буслай бур луттирдай га аьрщарай бакIлахъия хьун даншиврул дунияллий цалчин жу­гьутIначIа хIасул хьушиву мелиорация тIисса, ххяххияр_ттайн щин дишайсса, иширттаясса элму.
Гьай-гьай, жула зунттаву­сса аьрщарай бакIлахъия ххя­ххан дуван хъинну захIматри. Му захIматшивугу дархIуну дур жучIара цалий къадарцIусса, ххяххияртту яла чагъирайсса чIумал чявхъа бивчуну, марххала бувну, дургьумур зия дайсса тIабиаьт душивруцIун. Махъсса кIира-шанна шинал мутталийгу кIицI бувсса ишру тикрал хъанай бия.
Ца зат ялагу: хъанахъи­сса дяъвир­ду сававну, чIявусса лихъачалт бур кьиблалул хIу­куматирттая Европанавун най. ЩинчIавгу къаччиссар цала хIукуматрайн личIисса багьу-бизулул, дин-имандалул, культуралул, тарихрал инсантал най. Тана та чIявуми питнарду хIасул буллалисса США-нал паччахIлугъгума дур Мексиканал дазуцIух чIира буван су­кку хьуну. Улу, та чIира буван­сса арцугу бур тайннаща цащара ласлай.
На ванийну учин ччай ура, жучIанма гъансса кIанттурдай хьун бюхъайсса дяъвирду багьана хьуну, гьай-аман, жула дачIра хъанахъисса шяраваллавун ли­хъачалт къабачинмагу тIий. На ва пикрилучIан увкIунна 2014-ку шинал, Къирим Аьрасатнавун бувхсса чIумал. Дагъусттаннайнгу бувкIун буссия тичча­сса лихъачалт. Ккуллал райондалул жяматрал гайннан кумагран дартIуна 330 азарда къурушгума. Га чIумал ттун райондалул зумунусса къуллугъчинацIа бавуна: «300 лихъачу кьамул уван бюхълай бур жущава Ккуллал райондалийн», — тIисса махъру.
Мунияту ттун Чакъаллал МахIаммада ва Зумрут чIалан бикIай ччима аьлимчунаяр, къуллугъчинаяр, бучIантIимур архниятува чIалачIисса авадан­сса, усттарсса пикрирдал инсанталну.
Чакъаллал шяравалу дирхьуну дур 1-мур ЦIувкIуллал шяравун нанисса бакIлавай бачиннинсса ххуллул ухнияту кьиблалул чулийнмайсса ххуллийх лавгун, 700-800 мет­ралул архний. Шикку, ва хху­л­лул шанбачIулий, бур шяравалу сакин хьусса шинну ва Аухнавун дизан дурсса шинну ккаккан дуллалисса ула лачIун дурсса хъунмасса кьун. Бю­хъай вай кIия инсан яхъанахъисса къатта-къуш цалчин ккавкманан ва зат аьжаив бизангума, учиннуча, инсантурая ятну яхъанан ччисса инсантуран ккалли бангу .Му пикри дакIнийн багьмирив хъинну бяйкьлакьисса инсанталли. Циван учирча, бю­хъай шяраваллаву яхъанахъисса инсантурачIангума чансса бухху-букку бикIан МахIаммадачIан ва ЗумрутлучIаннияр. Вана на нава лавгра уттигъанну вайнначIан вайннал душ буллусса Ккуллал шяравасса Шамххалов Серегиннущал. Август барз цуппагу Ла­ккуй уртту-тIутIив чагъираву­сса дирсса чIун дикIай.Ва укун яруннин малхIан хъана­хъисса дуниял ххал дуван, бигьалаганмагу чанну бакъа букIлай ба­къар жула инсантал цалла шяраваллавун. Дурусну, МахIаммада цала яттугу Аьттарахун бавкьуну, шавайн увкIсса лахIзалий бивунав жу Серегиннул машиналий вайнначIан. Жуяту рязинуяв, баххана бивзун нахIуну хIап-хIат тIисса ца карчIгу бувккуна жул хьхьичIун. Хъинну рязину кьамул бувунав жу МахIаммадал ва Зумрутлул. Лакку ларзулугу шябивкIун байбишарду жугу цийнува цуппа кунма сукку хьу­сса ихтилат. Ихтилатрал хъунмур хъаргу ларсуна цайнна къатлул залуннал.
— На нава шикку, ва Ча­къаллал шяраву, 1940-ку шинал увссара. Ттул кулпат Зумрут 1-мур ЦIувкIратуссар. Жул наслуну хьунни мукьва душ ва ца арс. Ттул бутта дяъвилия зана къавхьуссар. ХIасил, «пропал вез вести». Зумрутгу, нагу пенсиялийн букканнин зий бикIайссияв Ваччав на статуправлениялул идаралий, Зумрут МахIачкъалалив занази­сса автобусирттал диспетчерну.Ттул душру буллусса куявтурава ца ур ЧIятусса учитель Арсений, гама 1-мур ЦIувкIратусса пагьламантурал школалул директор Рамазан, ина жучIан хъамалу увцуну увкIсса Ккулатусса Серегин, мукьилчинма куяв Аьли шагьрулия Лаккуйн заназисса маршруткалул шоферну зий у­ссар.Ттул арснайн ХIусайн учайссар. Буттан цIа дирзсса арсри. ХIусайн яхъа­най уссар кулпатращал Новостройрай Чапаевкалий. Га экономист ур. БучIайссар циняв ттучIан хъамалу. ОьвтIинма бикIайссар душварал ва арснал оьрчI-душру. Цивппагу бучIайссар хъун-бавачIан ва хъун-буттачIан.
Вай жу яхъанахъисса къат­ри дур 300-нничIан дир­сса шиннардил хьхьичIра дур­сса къатри. Жу вай даххана къадурссар, анжагъ ва хьхьичIсса лакку ларзу дуварча дакъа. Ттул мазрайн бувкIун бия ваначIан хъамалу лавгний хIасул хъанан бикIайсса, «ччуччисса», ца суал. Буллуссия ва суал на ванахьхьун:
— МахIаммадай, ва инава буллалисса захIмат буттал шяравалу ядуван, шиккусса зула инсантурал рухIру дучIавансса цIабиркь лещан къадитлати­сса даву зуяр махъ щил канил дугьантIиссар?
— ХхюцIалла шин шайхту, арснал учIанна тIар шийн яхъа­нан, — куну кутIасса жаваб дуллуна МахIаммадал.
Бунияла, нава луглай, ля­къахълай бивкIсса дакIнил цIуцIаву хъин дувайсса дарув ахиргу лявкъуну, гайннуя ца ххув учинсса тIайлабацIу хьуна ттун.
Инсаннал оьрмулул дуни­яллийсса мюнпатшиву дархIуну дикIай шанма иширацIун лавг­мур дакIния гьан къаби­тав­­­рицIун,гьарца кьинисса ишир­ттацIун ва ялун бучIан­мунил буруккинтту чан буван хIарачат баврицIун. Вай ишру хIисавравун ласун багьлан бикIай мукунма кулпатрангу, тухумрангу, шяраваллингу, миллатрангу, улу, щала паччахIлугърангу. Бю­хъарча вай ишру дузал буван, му чIумал инсаниятрал ххуллу бакIуйн бу­кканссия. Цуксса хъунмасса махъну хъанарчагу, МахIаммадал ва Зумрутлул ужагърава махъунай ачайхту ттун чIалан бивкIуна бушиву жула зунттаву нава кIицI був­сса ишру дакIния гьан къабитай­сса чумартсса инсантал. Хъинну битаннав зу Аллагьналгу, ттул МахIаммадай ва Зумрут!