ДукIу-кIурссанува, Цалчинмур ЦIувкIрав Шяраваллил кьини кIицI лаглагисса ппурттуву, Жяматийсса советрал хIукму бувна гьар шинах августрал цалчинмур нюжмар ЦIувкIуллал нюжмарну баян буван.

Яъни шагьрурдайсса цIув­кIул, учIан шайма ми гьантрай шяравун учIаван, бигьалаган ва шяраваллил жяматран мюнпатрансса иширттавух шайкун хIала буххаван. Икьрал дурна, август бучIаннинма, цукунсса давуртту дуван багьлай бурив пикригу бувну, маслихIат ккавккун, гьар шинах чIири-хъунсса давурттугу дуваван.
Биялсса агьлу бавтIун бия гьашинугу ЦIувкIрав. Яла хъунмур ххаришивурив чIявусса мюрщи оьрчIая дия.

Буслай бур Зиркьуева Шагьризада:
– ЧIявусса оьрчIру куннащал кув кIул хьунни, дустал хьунни, футболданий буккай командагума хIасул дунни. ЦIубутIуй цахъис бизар хъанахъисса жул гъансса оьрчIал, шяраваллил кIичIираву бакIрайн агьсса цаманахь: «Ина ттуплий уккан ччай акъарав?» – куну цIувххуну бия. Вана укун, хьунабавкьуми цачIун хъанай, футболистътурал кьюкьригу хIасул дурну, цIан лакьиннин ттуплий буклай бивкIун бия. Хъирив кьини вай ххари бан жу самовар дирзссия, нацIу-кьацIугу ларсун, дустал хьусса, лагма лавгсса оьрчIру хъин битлай, жувагу хавардай буссияв, гьавалий чяйгу хIачIлай. Спортрал тIуркIурдая рязисса оьрчIал, хъирив кьинигу: «Вара чIумал батIиннув?» – тIий цIухлай бия. ОьрчIан даши дизанмунил ялув пикри барду.

Хъирив кьини хъиннува ххуйну, цIарай пулавгу бувну, лагма лавгру. Ца кулпат кунма, ца урцIух лагма лавгру. Пикри барча, оьрчIал хIала буххан бунну, цачIунмай бунну жу, хъунимигу. Вана укун оьрчIру спортрал бяст-ччаллил тIуркIурду буллай, жу оьрчIахь шяраваллил тарихрая буслай, лагма-ялттусса кIанттурдал цIарду лахьхьин дуллай, жунмагу, оьрчIангу мюнпатранну мутта гьан буварду. Мизитравун архIал чаклийн заназиссагу бия. Дусшиву цIакь дурсса оьрчIру утти ялунчIиннин ссавур дакъа ялугьланссар гъинтнил каникуллах. Цала ттатта-бавахъул яхъанай бивкIсса шяравусса гьантри вайннан байрансса хьунни. Уку-укунсса давурттал, тIуркIурдал щак бакъа, шяраваллил агьалинал дянивсса арарду цIакь дуллалиссар. Шагьризадал увкумунийн ххи банна, шяраваллил активистътурал, «ЦIувкIуллал нюжмар» баян буллалийни гьанумур мурад буссия жулла хъирив нанисса ник, вайннан жула мархри, гьанурду хъама къабитаншиврул, шяравун кIункIу дуван. Миннан дакIний личIансса куццуй шяравусса гьантри гьан бувансса чараннал ялувгу пикри буван. Шиная шинайн «ЦIувкIуллал нюжмар» нирхиравунгу, сийлувунгу дагьланшиврийсса умуд ттулгу бур.

Умуд цIакь бувансса хIучча бур, Аьрасатнал цайми-цаймигу кIанттурдай яхъанахъисса цIувкIул ва хъамалгу шяравун кIункIу тIий бушиврул. Шиккува кIицI лаганна, шяравун агьали кIункIу бувансса давуртту дуллай, бунияласса хъар лахълай бушиву шяраваллил жагьилталгу.

ПатIимат Рамазанова