ЦIуссалакрал райондалул бакIчинал цIусса миналийсса хъиривчуну зий ур Маликлул арс Амир Султанов.

Амир Султанов шиккун учIан хьхьичIва зий ивкIссар МахIачкъала шагьрулул администрациялул кьатIаллищалсса экономикалул дахIавурттал управлениялий, муния махъ ДР-лул ХIукуматрал председательнал давуртту щаллу даврил управлениялул хъунаманал хъиривчуну. 2023 шинал октябрьдания махъ зий ур цIанасса къуллугърай.

Амир Султановлул бусаврийну, 2026 шинал мартрай ва апрельданий гужсса гъараллу ларчIуну, гьармур щинахьхьун лагаврил биян бувсса зараллу лахъан ЦIуссалакрал райондалийсса ялапарлувтурал выплатартту тIалав дуллалисса 6 азарва заявление бувкIун бия. Яла хъуними зараллу хьуну бия цIусса миналийсса ЦIуссаккуллал шяраваллийн. Тикку баян бувну бивкIссар ляличIисса тагьарданул низам. Мунийн бувну, га шяраваллил ялапарлувтурахь ихтияр диркIссар арцуйнусса кумаг тIалав буван, ичIаллил буза, хъус-хъиншиву лияву сававну.

Муниципалитетрал ЧС-рал комиссиялул ккаккиярттайн бувну, райондалийн бувкIун бивкIссар 6091 заявление. Миннувату 4247 бивкIссар цал архIал булайсса арцуйнусса кумаграл хIакъиравусса (единая материальная паомощь).
Заявленияртту ххал буллай бур укун: ми ххал буллай бур, тIайла буклай бур администрациялийн, микку ккаккан буллай бур миннун ци бан бурив, выплатартту дулун бурив, ягу инкар буван бурив (отказ).
ЦIуссалакрал райондалул бакIчинал хъиривчу, ЧС-рал комиссиялул председатель Амир Султановлул бусаврийну, цIанасса ппуттуву выплатартту дулаврил тагьар укунсса дур.
Дуллуну дур 442 выплата, дулун хIадур дурну бур (арцух ялугьлай бур) 211.
Райондалул администрациялийн тIайла бувккун бур цинявппагу 3462 заявление, (миннувух дур 1503 личIисса категориялул выплата).
Уттигу ххал бигьлай бур 4 заявление. Инкар бувну бур (отказано) цинявппагу 1346 заявление. Заключениялийну инкар бувну бур 4199 заявление, (миннувух 1145 личIисса категориялулсса).
ЛичIину ккаккан бувну бур цIуллу-сагъшиврун зарал биян баврицIунсса ишру, мукунсса заявленияртту буллуну бур 105. Миннувату 101 заявление инкар бувну бур къатIайласса сведенияртту ккаккан баврийн бувну, ялагу 4 – МВД-лиясса сведенияртту ккаккан баврийну. Комиссиялул даву дуллай бур хъинну аьчухну, гьарца заявление ххал бигьлай бур гьарца чулуха, хIукму буллай бур ккаккан бувсса критериярттал ва тасттикь буллалисса документирттал гьанулий. Муниципалитетрал властирдал бусаврийну, ми масъаларттал ялув бацIаву дуллай бусса бур ва бюхъайссаксса хIарачат буллай бусса бур кумаг буван буниялттунгу муних мюхтажну ливчIминнан.
Инсантуран къулайшиврун сакин бувну бур маслихIатрайну кумаг бавугу. Пишакартурал бувчIин буллай бур документру булаврил низам ва кумаг буллай бур инкар баврил сававрду дурчIин дуван.
Амир Султановлул бусаврийну, ЦIусса миналийн щаллуну дизан дурну дур 3 шяравалу – Аьхъар - 614 инсан, Шушия - 810 инсан ва ДучIими -1105 инсан. Микку бур школарду, оьрчIал багъру ва мизитру.
ЦIанасса ппурттуву духлаган дуллай бур шяраваллаву подрядчиктурал дурну диркIсса диялдакъашивуртту: ЦIуссаккуллал, ЦIуссалакрал шяраваллаву ва Чапаеволий цIу дуккан дуллай бур подрядчиктурал канализация дуллалисса чIумал итадаркьуну диркIсса диялдакъашивуртту. ЦIуссаккуллал шяраву ххуллурдайх асвальт бакьлай бур, ца кучалийх бавкьуну, утти цайми кучардайхгу бакьлай бур. Шяраваллаву диялну дур щин, ток, газ.
ЗахIматну бур цIусса миналийн халкь бизан баврил масъала. ЦIуссалакрал райондалий ливчIсса лак цIусса миналийн бизан баншиврул, уттигу цIусса миналий дуван аьркинну дур сайки 900-нниха лирчусса къатри. 2011 шиная шиннай цIусса миналий къатри дувансса арцу итадакьин ккаккан бувну бур региондалул бюджетравату, амма ми республикалул бюджетраву диялну дакъар.