«Цалчинминнал Суккушиннарал» конференция
ЦIуссалакрал райондалийсса Чапаевкаллал 2-мур школалий хьунни «Цалчинминнал Суккушинна» тIисса организациялул кIанттул отделениялул конференция.
Ва тIиртIунни Аьрасатнал, Дагъусттаннал ва «Цалчинминнал Суккушиннарал» гимнрайну. Президиумраву бия ЦIуссалакрал райондалул КIулшивуртту дулаврил управлениялул хъунмур Светлана Кудаева ва «Навигаторы детства» ккурандалул муниципал координатор ПатIимат Аьбдулмуслимова.
Делегатътурал 2026-ку шинал хIасиллугу дурну, ноябрь зурул 9-нний хьунтIисса региондалул конференциялийн гьанминнал сияхIгу цIакь дурну, Cуккушиннарал кьюкьлувун цIусса члентал кьамул бунни. Вайннан лахъа-хъунну Суккушиннарал лишанну дуллунни Жамилат Мусиевал ва ПатIимат Аьбдулмуслимовал. «Зарница 2.0», «Хранители истории», «Походы Первых», «Юннаты Первых» ва мукунна цаймигу Суккушиннарал агьамми проектирдая бувсунни вайннал оьрчIахь. «Мы – граждане России» тIисса щалагу Аьрасатнал акциялул лагрулий оьрмулул 14 шин хьусса жагьилтуран Аьрасатнал паспортру буллунни. ЦIуссалакрал райондалул бакIчи МаматIи ХIамзатовлул ва райондалул КIулшивуртту дулаврил управлениялул чулухасса бахшишру оьрчIахьхьун дуллунни Светлана Кудаевал.
КIицI лаган, «Цалчинминнал Суккушинна» тIисса Щалагу Аьрасатнал оьрчIал ва жагьилтурал организациялул муниципал координатор хъанай бур райондалул КIулшивуртту дулаврил управлениялул методист, тарихрал ва обществознаниялул дарсирдал учитель, «Юнармиялул» школардай патриот даву дачин дурсса куратор Жамилат Кьурбанова.