Комсомолданул тарих – инсантурал оьрмулул ххуллул тарихри. Тани дуккавриву, давриву хьхьичIунма комсомолданул даврийн кIункIу уллай бивкIун бур, мунаяту микку агьалинан мюнпатгу, хайргу биялсса бикIантIишиву кIулну.
П. Рамазанова
[dropcap]Ш[/dropcap]авкIуллал шяраватусса Оьмарил душ Ххалла Аьбдуллаевал 1964 шинал Дагъусттаннал университетрал историялул- филологиялул факультет ххуйсса кьиматирттай къуртал бувну махъ, тIайла бувккун бур Лакрал райондалийсса Уриннал школалий дарсру дихьлан.
![](http://ilchi.beget.tech/wp-content/uploads/2018/10/IMG_7502.jpg)
Му отделение (тарихралмур) къуртал бувминнаву 25 оьрчI ивкIун ур, так ца душ — Ххалла Аьбдуллаева. Ва буслай бур Уруву тани Амир Амиров тIисса директор ивкIшиву.
Гъирарай учительнал даврий зурчагу, лахъи къалавгун бур ва даврий: школалий ванил комсомолданун хас дурну дурсса мероприятие ххуй дирзун, бувцуну бур райондалийн комсомолданул даврий зун. Ванил каялувчинал бюхъу-гьунар чIалай, цал комсомолданул райкомрал кIилчинмур секретарьну бивтун бур, яла бивтун бур комсомолданул цалчинмур секретарьнугу, ВЛКСМ- рал Дагъусттаннал обкомрал комсомол даврил секторданул хъунмурнугу. 1965-66 шиннардий Москавлив Централ комсомол школалий, кIулшивуртту куртIгу, цIакьгу дуллай, гъирарай дуклай бивкIун бур. 1982 шиналлив заочнайну къуртал бувну бур Ростовуллал партиялул школа.
Ххалла Аьбдуллаева ци къуллугърай зурчагу, бюхъулий ва сантирай даву дувайсса бюхъулул заллу бушиврий цIа ларгсса инсан бур. Мукун зузиминнал кьимат бусса та заманнай ванийн МахIачкъалалив III Интернационал фабрикалул парткомрал секретарьнал давугу вихшала дурну дур. Муния махъ зий бивкIун бур ЦIуссалакрал халкьуннал депутатътурал райсоветрал исполкомрал председательнугу, ДАССР-данул Министртурал советрал кабинетрал хъунмурнугу.
[dropcap]М[/dropcap]ахъсса шиннардий зий бивкIун бур лакрал агьали цIуминалийн бизан баврилсса буллалисса хIукуматрал отделданул хъунаманал хъиривмурну. Каялувчинал даврил биялсса опыт бусса Ххалла хIакьину Дагъусттаннал БакIчинал Хъунисриннал советрал членнугу бур. Ванин дуллуну дур «ХIурматрал лишан» орден ва медаллу, бахшишру. Ва бур захIматрал ветеран, бувчIуну бивкIун бур ВЛКСМ-рал 15-мур съездрал делегатнугу, комсомолданун 50 шин шаврин хас дурсса ЦК ВЛКСМ- рал Пленумрал делегатнугу. БувчIуну бур мукунма Щаллагу Союзрал хъаннил конференциялул делегатнугу.
![](http://ilchi.beget.tech/wp-content/uploads/2018/10/dhstjsrtj.jpg)
Ванин дуллуну дур «Дагъусттаннал паччахIлугърал къуллугърал лайкь хьусса зузала» тIисса цIагу. ЧIярусса шинну комсомолданул къуллугъирттай зий, жагьилтурал тарбиялул буруккинттарай бивкIсса ва хIакьинугу мийва буруккинттарай бур. «Тани комсомолданул авторитетрал жагьилтал цIакьну бувгьуну бикIайва. Лаккуйн бувкIсса студентътал чара бакъа райкомрайн буххайссия, шяраваллил жагьилтурал ва студентътурал хIала- гьурттушиву цIакьсса дикIайссия.
Гьарцагу шяраву комсомолтал чялишну шяраваллил давурттавух ва оьрмулул иширттавух хIалану буссия. 1966- 67 шиннардий жулла райондалул культуралул бригада лавгссия ЧиркIайннал ГЭС буллалисса строительтуран концерт ккаккан дуван. Му даврил дайдихьу жуя дурсса, яла цайми районнал культуралул зузалтгу мукун строительтурачIан концертру ккаккан дуллай занан бивкIссия, чIявусса иширттаву ва давурттаву райондалул жагьилтал хьхьичIунминнавух буссия»- тIий дакIнийн бутлай бур Ххалла.
Жаваблувшиву ххисса давурттай зий бивкIсса ванин дакIний личIансса ишругу чансса бакъар. «Дяхьхьунивугу шания бивзун бачин багьайва, цания ца шяраву къалмакъал хьуну дур, жагьилтал кувннащал кув бивну бур тIий. Комсомолданул инсантуращал зун лахьхьин бувна ттун. Билаятрай тани комсомолданул кьюкьраву буминналли шавкьирай хъунисса стройкартту сакин дурсса: целинарду. ГЭС-ру, БАМ-ру – комсомолнал захIматрал бакIлахъияр», — тIий бур Ххалла. — Партиялуву зунмигу комсомолданул-я хIадур бувайсса ва ми давурттаха зунсса гъирагу лекъащайсса бия…», — хIакьинугу жагьилтурал тарбиялул буруккинттайнма бур ва. ХIакьину жагьилтал давурттив дакъа бур, давурттив дакъахьукун, кулпатру бангу анавар буклай бакъар.
Даврийн кьамул къабуллай бур жагьилтал, стаж бакъар тIий. Къабуцлай бухьукун даврийн, чуври миннал стаж бантIисса, хIукуматрал вари чинсса аякьа дакъар жагьилтураха, дакъар чIарав бацIу бувансса программа, зунсса, яхI буллансса гъира- шавкь».
Ххалла Аьбдуллаева дакI дарцIуну бур каялувчиталну зунсса кадрарду хIадур буллалисса ххаллилсса школану бивкIшиврий. Барчаллагьрай бур, тани райкомрал цалчинма секретарьнал къуллугърай зий ивкIсса Оьмар-ХIажи ЦIаххаевлуйн.
Ванил дакIний ливчIун бур ца укунсса ишгу. Жагьилтуращал хьунаакьин Совет Союзрал Виричу Ризван Сулаймановлул хъирив лавгсса чIумал, мунал ялавай нани ххуллийгу, махъунай нани ххуллийгу ЦIахъардал Къуманивусса ца щаращучIа (цIанакул кIикку щаращи бакъар тIий бур, бухлавгун), машина бацIан бува увкуна тIар Ризваннул. Ххал барча, га щаращучIа бавцIуну бивкIсса ххюва машина бувцIусса жагьилтурал сагъну аьрая зана хьурча, га щаращучIа аглан шавансса икьрал дурну диркIун дур.
Москавлив, комсомолданул 50 шинан хас дурсса Пленумрайн лавгсса делегациялувух Ххаллащал архIал Ризван Сулаймановгу ивкIун ур.
Ххалла Аьбдуллаева хIакьинусса кьинигу цилла кIулшивурттугу, опытгу, бюхъу- хIарачатгу ишла буллай, зий бур шяраваллингу, лакрангу, Дагъусттаннангу агьамшиву дусса давурттаха. ЗахIматшивурттавугу, ххаришивурттавугу ва мудангу агьалинал чIарав бавцIусса инсан бур.