МахIачкъалалив, Расул ХIамзатовлул цIанийсса Национал библиотекалуву, октябрь зурул 16-нний Ккавкказуллал Чичултрал клубрал 2-мур съездрал даву дайдирхьунни. Мероприятиялий гьуртту хьунни Кабардин-Балкьарнавасса, Ингушетиянавасса, Чачаннавасса, Краснодардаясса чичулт.

Дагъусттаннал национал политикалул ва диндалул иширтталсса буллалисса министрнал хъиривчу Арсен МахIмудовлул министр Энрик Муслимовлул цIанияту барча бувна съездрайн бавтIцири. Ванал кIицI лавгуна, клубрал вакилтал литература хьхьичIуннай дуллай бушивруцIун, Ухссавнил Ккавкказуллал ва Аьрасатнал Чичултрал дусшиврул арарду цIакь дуллай бушиву.

Ккавкказуллал чичултрал клубрал президент, Аьрасатнал чичултрал Дагъусттанналмур отделениялул председатель, машгьурсса шаэр, публицист, таржумачи Миясат Муслимовал бувсуна клубрал гьану бивзшиву халкьуннал шаэртурал СалихI Гуртуевлул ва Муса АхIмадовлул. Клубрал 15 шинал мутталий дуллалисса ва дурсса давурттая буслай, кIицI лавгуна клубрал сипталийну бувайсса щаллагу Дунияллул халкьуннал дянивсса СалихI Гуртуевлул ва Апанни Къапиевлул цIанийсса конкурсру ялу-ялун сийлувун багьлай бушиву. Вай проектру барачат хьуну, МахIачкъалаллан «Ухссавнил Ккавкказуллал литературалул тахшагьру» тIисса цIагума дирзшиву. Бувсуна ванил таржумачитурал сайт зузи буллалишиву ва сайтгу Дагъусттаннал бакIчинал Грантрал кумаграцIух зузи буллашиву.

Съездрал лагрулий жагьилсса шаэртурансса мастер-классру, поэзиялул вечерду хьунтIиссар МахIачкъалалив ва Дарбантлив. Съездрал даву октябрь зурул 19-ннийнин лахъи лагантIиссар.

ПатIимат Рамазанова