Региондалул каялувчи Сергей Меликов хьунаавкьунни республикалул творчествалул интеллигенциялущал. БакIчинащалсса хьунабакьаврий гьуртту хьунни чичулт, журналистътал, къавтIалт, театрал ишккаккулт, художниктал, композитортал, кинематографистътал ва архитектортал.
– Культуралул инсантал цачIун, гъан буллалиссар, махъа нанисса никираву Ватандалухсса ччаву цIакь дуллалиссар. Украиннаву цалва пишалул бурж биттур буллай жан дуллусса Аьрасатнал Виричу НурмахIаммад ХIажимахIаммадовлул шаэр Расул ХIамзатовлул назму ккалаккисса видео дуллунни жагьилнал нитти-буттал. Укунсса оьрчIру цаймигу буссар. Ирсирал, никирттал дянивсса дахIаву цукунчIав къаруцайссар, хIакьину жулва жагьилтурал дуллалисса виричушивуртталгу ва кIану тасттикь буллалиссар, – увкунни, батIаврил дайдихьу дуллай, Сергей Меликовлул.
Гихунмайсса ихтилатраву Сергей Меликовлул кIицI ларгуна Фазу Аьлиевал ва Расул ХIамзатовлул юбилейрттал мажлисирттай творчествалул интеллигенциялул дуван нанисса гьурттушиндарал агьамшиву. БатIаврий ихтилатру хьунни творчествалул планнаясса ва хьхьичIун дагьлагьисса дайшишрурдаясса, паччахIлугърал чулухасса ка-кумаграл хIакъиравусса.
Дагъусттаннал Театрал ишккаккултрал союзрал каялувчи Айгум Айгумовлул Республикалул БакIчинахь тавакъю бунни «Актернал къатта» тIитIаврил сипталул чIарав ацIу тIисса. Ва Къатта баврил ххуллийсса давуртту дайдирхьуну дусса дур. Республикалул культуралул министр Зарема Буттаевал бувсунни «Актернал къатлул» ялув госэкспертизалул хъин чулийсса заключение дуркIшиву.
ХIакьинусса кьини жулла республикалий дур творчествалул ацIра союз. Хьунабакьаврий ялагу ихтилат бунни «Лезгинка» ансамбльданул директор Жамбулат МахIаммадовлул, Чичултрал союзрал председатель МахIаммад АхIмадовлул, Дагъусттаннал Архитектортурал союзрал хъунама Увайс Камаловлул, Журналистътурал союзрал хъунама Аьли Камаловлул, «Аьрасатнал чичултрал союз» тIисса организациялул Дагъусттаннал отделениялул председатель Миясат Муслимовал ва цайминнал.
