Ватан дуруччайманал кьинилул хьунийн Лакрал райондалул бакIчи Юсуп МахIаммадов цала зузалтращал ялтту увккунни хасъсса аьралий операциялий ватандалул мурадру буруччаврил ххуллий арсру талатисса кулпатирттал.
Цалчин ивунни СалихIовхъачIан. Вайннал арс Исакь захIматсса щаву дирния махъ хъин хъанай ур госпитальданий. Ччясса мутталий азигу лавгун, цала нитти-буттал ялун увкIун ккакканнав!
Хъирив делегация лавгунни Кьурбановхъаннийн. Вайннал арс Рустам, цуксса хIайпнугу, августрая шихунай связьрай акъасса ур. Арснал кьадардания нитти-буттан кIулну бакъар цичIав. Кулпат ва шама арс вихну бур Рустам сагъ-саламатну ушиврийн. Мукун лякъиннав! Ччясса мутталий Рустамлуя ванал ужагърайн ххарисса хавар бияннав!
— ХIакьину хасъсса аьралий операциялий ватандалул мурадру буруччаврил ххуллий арс талай усса цумур-цагу кулпат хъанахъиссар чувшиврул ва кьянкьашиврул, ватандалухсса ччаврил эбратну, – увкунни Юсуп МахIаммадовлул. Бувсунни ххал бивгьуну бушиву талаталтран ци кумаг бан багьлай бурив, вайннал кулпатирттал чIарав цукун бацIан багьлай бурив. Вай дакI дарцIуну бикIан аьркинссар щалагу райондалул агьали цал оьрчIал къучагъшивурттая пахрулий бушиврий ва гьарцагу ишираву чIарав бацIан хIадурну бушиврий.
Барчаллагь увкунни хIакьину ватандалул мурадру буручлачиминнахь ва вайннал гъан-маччаминнахь.
