Ца шинава цIуницIа, къинттуллухсса фронтрай зузисса (чIявуссаннан, аьщуйн щуну учиннив, дяъвилул иширттая хавар бакъасса кунма, цайнма къабагьайссар тIисса тарап дургьуну къуццу тIутIиминнан, бюхъай ва калима аьжаив дизангу) инсанначIан бивра на. Ва инсангу къизгъинмур фронтрансса дарзири.
Шинал хьхьичIва на хьунабавкьуссияв СВО-лийминнан ва госпитальлай хъин хъанахъиминнан янна дурухлахисса, Геологиялул институтраву зузисса, ЦIуссаккулув яхъанахъисса ПатIимат Базмановащал. Бувсъссия ванил ичIува багьайкунсса «янна дуруххай чIиви цех» бушиву. Бувсъссия мунилгу, цайми уртакьтуралгу фронтран кумаг буллалисса даврия. ПатIиматлущал гъалгъа тIутIийни, асар хьуна ванил «талатиминнал дакIру чанссарагу гъили лаганшиврул» зий буру тIисса калима кIийла-шамийла тикрал дувавугу. Украиннаву аьралий ишру байбивхьуния махъ зийнмари бусса ПатIимат, уттигу «талатиминнал дакIру гъили лаган дувансса хIарачатрай». Ванил щалва къатта жура-журасса мучIал бувцIуну бур. Вайннуя ванил усттарну буруххантIиссар госпитальлай хъин хъанахъисса, захIматсса цIунцIияртту хьуминнал базурдал лув бишинсса кIараллу-косточки. – СВО байбивхьуннихха, гъан-маччанал батIавурттава, бухху-буккулува бакъава хьуссар ПатIимат. Ва щалвагу тухумран ххирасса, цавагу ккалли бансса иш лях гьан къабитайсса инсанни. Аьралий ишру байбишайхту, кьувтIунни ва давривун. Телефондалувух ихтилат буллалинийгума чIалан бикIай, ва цилла ххал-ххалаххул даврилсса буллан анавар буклай бушиву. Къабувххурав, къабигьалаганнав куну цIуххайхтугу, жаваб цар дусса: дурухлантIиссара СВО къуртал хьуннин. Даврилссагу, къатта-къушлилссагу, къашавайсса ласналссагу бувну, мажал хьувкун, дурухлай щябикIай. Хьхьуния кьини дурну зий бур, – тIий бур ПатIиматлул ссурахъу Самрат Горчханова. – Тай госпитальлайсса оьрчIан ттулва хIарачат аьркинну бушиву кIулну бунува, хьхьуния кьини къадурну пайда къашайссар. Мюнпат бакъа ларгсса чIумул мутталий хIайп тIун бикIара, ваксса хIаллай нава кIива-шанма кIаралу бурухханссияхха тIий. Хаснува кIинттул ,лигьулул хъанай бухьунссар тIий, дакI аьратталну дикIайва, жу гъили яннарду дурухлай, тIайла дуклай бивкIру. Утти цахъисрагу дакI пагь кунни инт дучIайхту. Амма даву тачIавгу чан къашай, – тIий бур ПатIимат.
«Шьем для наших. Дагестан» тIисса, талаталтран янна дурухлахисса группалуву ца яла чялишмурди ПатIимат. Укунсса группарду Аьрасатнал цайми регионнайгу бур. Вайннайн хIурматрай «швейные войска» учай. Буниялттунгу, аьралуннал баймур къинттуллух буллай бур вай душру. ПатIиматлул наслугума гьурттуну бур ва давривух. На бувсъссия хьхьичIвагу, цал уттигу тикрал буван ччива ва хаваргу. ПатIимат СВО байбишиннингу мудан, детдомрал, интернатрал оьрчIан шайсса кумаг буллай, янналул кIюланан яннарду датIлай бикIайсса бивкIун бур. Цал укун дартIсса янналул бакIу ккавксса арснал оьрчIал (вай МахIачкъалалив яхъанай бусса бур ) цIувххуну бур, ина уттигу детдомирттан датIлай бурав куну. Бакъара, Украиннавусса оьрчIан датIлай бура увкуну бур, бувсун бур тийх дяъвилул ишру бушиву. Ца-кIира нюжмардува бувкIун бур арснал оьрчIру, цалла лаххиялул ва игрушкарттал чантайртту бувцIуну. «Гуманитар кумаг биян бувну бувкIсса Ума Аскарханова ккаккан дуллай бия группалуву видео, танкалул хьхьичI бавцIуну сурат рищун ччай буссиявча, танк гургу тIун диркIун, ва дачин най дурхха тIий, нигьавххуну, хьхьичIа ливхъра тIий. Ттула арснал оьрчIал гьан дурсса кIукIлу игрушка ккарккун танкрай, дакIнивун ца гъилисса асар бувххуна. ОьрчIан ккаккан дувайхту, вайгу, циван ххари къахьуви, ххари хьуна», – тIий бур ПатIимат. Укунма ххари шайшиву бусай цалла дурурххусса лаххиялувусса аьралитурал барчаллагь тIисса видеосуратру дучIайхтугу. Вай 2 шинал лажиндарай госпитальлайгу щавурду дирсса, цIунцIияртту хьусса циксса вирттавран бучIи лявкъухьунссар ванил бурувххусса кIараллу.
– Так цIуллуну шаппай занахьуннав жулва чиваркI, дуруххаврил, буххаврил иш бигьассар, СВО къуртал шайхту бигьалагантIиссару», –учай ПатIиматлул.
Ва дякъатлувусса мучIал бакIучIан анаварну бур. Ванил кIараллах госпитальлай ялугьлай бур. Вай мучIал бакIурдия ПатIиматлул бувантIиссар къитI-къитI бивтсса кIараллу. Усттарнал давугу дуван аьркинссар усттарну учарухха. Вагу къинттуллухсса аьралий усттар бурхха, личIирив!
ПатIимат Рамазанова
