Миллат чIивишиврух къабурувгун, яла чIявусса чиваркI лавгун бивкIун бур жула лакрава цала хушрай Хъунмасса буттал КIанттул цIанийсса дяъвилул шиннардий Ватан душманная дуруччин. ЧIявур хIакьинугу цала хушрай Украиннал аьрщарай нанисса хасъсса аьралий операциялий яла цIу кIириний цала къучагъшивуртту ккаккан дуллалисса лакрал жагьилтал
КIира ва дачIи шинал мутталий хасъсса аьралий операциялий талай, учIанагу цалчин игьалаган увкIун ур Карашрал шяраватусса Мусал ва Зубайдатлул арс Шяъван.
ХIакьину Шяъваннун дур дикIаннарагу 23 шин. Цувгу ва чIивисса оьрмулий хасъсса аьралий операциялий ккаккан дурсса къучагъшивурттахлу уттинин лайкь хьуну ур паччахIлугърал шанна ларайсса наградалун – Чувшиврул ордендалун, Жуковлул медальданун ва «За образцовое исполнение воинского долга» тIисса медальданун. Ккаккан увну ур кIира наградалун ттигу.
Ватан дуруччултрал кьини дунияллийн увксса Шяъваннул оьтту-ттурчIавура духьунссия ватандалухсса ччавугу, къучагъшивугу, чувшивугу. Февральданул 23-нний дахьра оьрмулул 21 шин бартларгсса жагьилнал хасъсса аьралий операция байбивхьусса кьинива хIукму бувну бур ватандалул мурадру буруччаврил ххуллий талан гьан. Оьрму аьралий къуллугърацIун бахIинсса пикрилий ивкIун ур, аьраличунал бурж лахълай унува.
Дагъусттаннал паччахIлугърал университетраву ккалаккисса студент, 2 курс къуртал байхту, 2021 шинал цала хушрай лавгун ур аьралий бурж лахъан.
Къуллугъ буллай ивкIун ур Камчаткалий 40-мур Краснодарско-Харбинский ЯтIул Ттугълил бригадалул хьхьирил пехоталуву (хасъсса аьралий операциялий Угледар, Папасная, Гостомель кIанттурду лавсун махъ Аьрасатнал президент В. Путиннул ва бригадалун дуллуну дур «Гвардейская» тIисса цIа).
Аьралий бурж лавхъун махъ, тиккува ацIан ччай, контракт чичин, ацIилваксса рапорт буллуну бур. Амма аьралитал биялну бур тIий, контрактгу къачирчуну, занахьуну ур шавай. ДачIи шиннарагу чIарах дукканнин байбивхьуну бур Украиннал аьрщарай хасъсса аьралий операция. Шяъваннулгу гавацIана батареялул командирначIан чивчуну бур, ватандалул мурадру буруччаврил ххуллий талан хIадурну ура куну.
КIива барз медкомиссия буллайгу лавгун, майрай контракт чирчуну дур. КIира нюжмардий БТР-даний талансса хIадуршиннагу лархьхьуну, лавгун ур хасъсса аьралий операция нанисса кIанттайн. БакIрайн агьну ур та яла цIу кIирисса Угледардал чулийн.
Тикку талай ивкIун ур июльдания сентябрьданийннин. Сентябрьданий щаву дирну, госпитальлай хъин хъанай ивкIун ур. Цува хасъсса аьралий операциялийн най ушиву нитти-буттая кьюлтI бувну бур, гайннан кIул хьуну бур ва госпитальданий хъин хъанахъисса чIумал.
Реабилитациялия махъ кIилчингу тихуна лавгун ур. Тани ванащал Ккуллал шяраватусса Магьдиев Мурадгу архIал ивзун ур. Му базилух Шяъван пулеметрай ивтун ур.
– На усса расчетраву жу 4 бияв: ттущал яручу, къумукь ва оьрус. Мукьагу дагъусттанчу цачIу бикIаншиврул ттун ччай бия оьруснахлу Мурад жучIана уцин. Амма мукунсса мутта жухьхьун Заннал къабуллуна. Ца гьужумраву ттуйн захIматсса щаву дируна, Мурад тIурча, оьрмулуцIа хьуну ия. Дяъвилий чIаравманахсса ччаву куртIсса дикIайсса дур. ЧIаравманал бакIрая чIара дагьаяр, цува ивкIуну хьурдай тIий икIайсса ур. Мурадлул ниттил ттучIанма оьвчайхту, мукунсса асар ттул дакIнивугу хIасул хьуна, – дакIнин бутлай ур Шяъван.
Ази лагайхту, цIунилгу тихунай авчуну ур Шяъван, чурххаву дукъарккун лирчIсса цIалцIивгу дунура. Ва базилухь аьралий частьрал хъунаманал, ттигу цIу кIиринийн тIайла уккан ччай акъара тIий, Белгородрайн гьан увну ур дазул мюхчаншиву дуручлан. Тикку цал чIавама сержантнал, яла сержантнал чиндалийн лавхъун ур. Ца шин тиккугу дурну, тIайла увккун ур Курскалийн.
Редакциялийн увкIсса ппурттуву Шяъван ия отпускалий. Цаппара гьантрава университет къуртал бувшиврул дипломгу лавсун, гьан тIий ия махъунай. Ва базилухь – цIунилгу хасъсса аьралий операциялийн.
Буний Заннал ябувну лякъиннав зу, цинявппагу жула оьрчIру! Лахъи къалавгун, сагъ-саламатну ялун бувкIун ккакканнав!
Зулайхат Тахакьаева
