Дагъусттаннал жяматран кабакьу буллалисса штабраву (Штаб общественной поддержки ) чIун-чIумуй ниттил мазру ябаву мурадрайсса давурттугу дуллай бур. Ларгсса итникьини ва штабрал вакилтурал жул редакциялийн оьвкуна, лакку мазрайсса «Элиас» тIисса тIуркIулий буккан. Ва АьбдурахIман Исмяилов тIисса жагьилнал ляхъан бувсса тIуркIур, цуппагу дагъусттаннал мазурдий. Ссигъри бувчIаву кунмасса. ТIуркIулуву гьуртту хъанахъиминнал, цуппа махъ зумух къалавсун, мукъул мяъна дурчIин дуван аьркинссар, махъминнал бувчIин му ци махъ буссарив.
Штабрал зузалтрал жун жанахIравусса «СаллатIнал сурат» тIисса проект ккаккан бувна, бувсуна проектрая балжину. Ва Жамаллул цIанийсса Художественный училищалул студентътурал СВО-лий гьуртту хьуминнал суратру дирхьусса проект бур. КIяласса хахливу дия уттаваминнал суратру, лухIиминнуву – ливтIусса вирттаврал суратру. Дия Аьрасатнал Виричу НурмахIаммад ХIажимахIаммадовлулмургу. КIицI лавгсса штабрал хъунаманал хъиривчу Зайнаб Аьлимирзаевал бувсуна, штабрал хъунмур къулагъас душиву оьрчIру ва жагьилтал патриот зумуну тарбия баврих, СВО-лий жанну харж дурминнал аьпа уттава буллалаврих, аьрайминнан гуманитар кумаг батIаврих.
Яла жу, тIуркIу бувай залданувун бавтIун, кIира командалийх бавчIуну, мукъурттил мяънарду ттирикIин хIарачатрай, ччаллий бувкру. Ва «Илчилул» тарихраву редакциялул командартту ччаллий дурксса цалчинсса иш хъанай бунуккар. Гьаннайсса, редакция чIумуйнусса кIибивщусса. ТIайламур бусан, жун, ниттил маз кIулминнангума, хIаз бизансса, анаварну пикри буван лахьхьин буллалисса, ня зузи дуллалисса тIуркIу бия. Ваца кроссвордру аьмну, лахъну дуцIин дуллалисса кунмасса.
ТIуркIулия махъ жу бусарду жулвами пикрирдугу, цIанакул, ниттил мазру лахьхьин буллалаврил кьяйдарду дух дурксса ппурттуву, оьрчIан ва жагьилтуран ниттил мазру лахьлансса гъира багьансса ххуллурду ляхълан багьлай бушиву, «Элиас» тIуркIугу ва ххуллийсса ца чаран бушиву. Ва тIуркIу оьрчIал ва жагьилтурал дянив машгьур булларча, вайннал мукъурттил луртангу авадан хьунтIиссар. Укунмасса ва ваничIан гъансса лакку мукъурттил тIуркIу жущавагу ляхъан буван шайрив ххал буванни утти жун ливчIсса.
ПатIимат Рамазанова
