«Память гор» тIисса жяматийсса ккурандалул Лакрал райондалийсса отделениялул ва хасъсса аьралий операциялул Ветерантурал ассоциациялул хъунама Юнус Эфендиевлул Барчаллагьрал чагъар буллунни ДР-лул Халкьуннал Мажлисрал депутат Марат Илиясовлун, СВО-лул гьурттучитуран ва вайннал кулпатирттан буллалисса кумаграхлу.

Юнус Эфендиевлул кIицI лавгунни Марат Илиясовлул буллалисса кумаграл агьамсса кIану бугьлай бушиву хасъсса аьралий операциялий гьуртту хъанахъиминнал ва вайннал кулпатирттал оьрмулуву.
«ЖучIа кьиматрай дуссар хасъсса аьралий операциялий талатиминнал кулпатру ва ветерантал социальныйну буруччаврийн багьайсса суаллу биттур баврил ххуллийсса вил даву. Вил кумаграйхчил чIявусса кулпатру буклакиссар захIматсса тагьарданува», – увкунни Юнус Эфендиевлул.
Марат Илиясовлул, бивщусса кьиматрахлу барчаллагьгу куну, бувсунни цува гихунайгу хIадурну ушиву хасъсса аьралий операциялул гьурттучитуран кумаг баврил ххуллий зун.
Бувсунни гуманитар кумаг батIаврил ххуллий дуллалисса давриягу, ва къабигьасса чIумал агьалинал цашиву агьамсса ххуттай ккаклай.
«Жува жущава шаймур буллан аьркинссару ватандалул мурадру буруччаврил ххуллий талатиминнал ва вайннал кулпатирттал чIарав бацIаврил ххуллий. Ва жула аьмсса мурадри, нагу хIадурну ура ва мурад щаллу шаврил цIаний шаймур буллан», – увкунни Марат Илиясовлул. Гихунмайсса ихтилат бия хасъсса аьралий операциялий гьуртту хъанахъиминнал ва вайннал кулпатирттал оьрмулул шартIру къулай даврил ххуллийсса чараннал ялувсса.