Жу уттинингу чивчуссия январь зуруй МахIач­къалалив Сепараторнайливсса хIатталу, субботникрайн бувккун, ччюрклицIа марцI дуршиву КIамахъаллал ва Ппалассуннал чиваркIуннал кьюкьлул. Вара даву цIуницIагу дунни вайнналла. Ларгсса бигьалагай кьинигу бувккунни хIатталлив танияр махъ салкьи хьусса ва таний ка хъирив къаларну лирчIмур датIин, ххуйссагу, чириссагу даву тикрал дуван. На ва иширая социал сетирдайгу бувсъссия, чIявуссаннан эбрат хьун­сса давугу духьувкун.

– Жу уттигъанну нитти-буттал гьаттардийн биян лавг­ссияв, лагма-ялттусса кIантту, марцI бувну, лавкьуну бия, жагьилсса арамтал занай бия хъунисса дарвагругу лавсун, хIатталлив ду-дуний кьариртмур датIлай. Инсантуран пакетру, баклашкартту, цементрал ххиличIрурду, мумур-тамур кьаритан цукун дакI дияйссарив къакIулли, хаснура чапалсса аццив кьаритлай бур чIаравминнал гьаттардицIух. Ххуйну марцI дурну дия хIатталу, жу ми жагьил­турачIан гъан хьуну, барчаллагь учарду, – тIий, чичлай бур Лакрал театрдануву зузисса Жанна Оьмарова.
Чирину тIайлабацIаннав, уздансса КIамахъаллал ва Ппалассуннал чиваркI! Укунсса даву дуван дакIнийн багьналгу, дуван бувкIминналгу оьрмурдай барачат бишиннав!