Гъумук, цIу дагьну, Рабият Жалаловал къатри ччурччусса хавар баяйхту , Мариян Илиясовал цIанийсса «Дараччи» клубрал душругу анавар бувккуна цащава шайсса ка-кумаг буван. Чялишну хIала бувххуна «Дараччилул» Москавливсса филиалданул душругу.

Вай гьантрай фондрал хъунмур Гульшан Хасаева ва Тарият Къапиева бивунни Гъумукун РабиятлучIан, душваврал дартIсса арцугу дулун, ичIура ишла дуван аьркинсса тIахIни-кIичIу,мумур-тамур диян дуван.
– Цакуну, кIул бакъа бала ялун бивну, ялув магъи дакъа ливчIун кулпат, кьини дурккун бия, гьай-гьай. Лакрал жямат мудангу кувннан кув кумаг буван цачIун шайсса ххуйсса аьдат цIакь хьуну дур ччянияцIара. Хаснува кIукунсса бала ялун бивсса чIумал циванни бюхъаймунил кумаг къабуван. Гьакссагу бусрав хьуну, бакIра-бакIрах гьарманахь барчаллагь тIий бия Рабият. Умудрай бура, лахъи къалавгун, къатри, дакьин дурну, цIу дуккан дуванссар, кабакьинмигу, кумаг буванмигу утти­гу букканссар тIий, – увкунни Гульшан Хасаевал.
Ванил тIимур ЗанначIангу бияннав! Хъинбала хъинбалану зана бикIаннав «Дараччилул» душваврачIангу!