Уттигъанну ЧIяйннал шяраву студентътуращалсса хьунабакьаву хьунни. Ванил сиптачи бия Магьирлугърал къатрал хъунмур СалихIат Алхасова.
Дуклаки оьрчIащал хьунабакьин бувкIун бия Саратовский областьрайсса Краснокутскаллал СССР-данул лайкь хьусса пилот Ф. Васиннул цIанийсса граждан авиациялул летный училищалул 1-мур курсирай дуклакисса Ярагъи Билалов ва МахIачкъалаллал праволул академиялул 3-мур курсирал студент Ажуб Оьмаров.
– Ва ххуллухьсса мероприятие хас дурссия студентътуран. ХьхьичIара ччя-ччяни дайссия ва сийлий дикIайссия личIи-личIисса хьунабакьавуртту. Ттун пикри хьунни дуклаки оьрчIру студентътуращал дахIаву дуну, хIала-гьурттуну бикIаву мурадрайсса хьунабакьаву дан, – увкунни СалихIат Алхасовал.
Студентътурал оьрмулия бувсунни Ярагъи Билаловлул. Дуклаки оьрчIахь мюнпатсса насихIатру бунни Ажуб Оьмаровлул. Ярагъи ва Ажуб хьхьичIунну дуклакисса, эбратрансса студентътал бур. Вайннал цала ихтилатирттаву кIицI лавгунни, кIулшивурттал ччимур ххуллу тIитIайшиву. Дуклаки оьрчIайн оьвчаву дунни, хьхьичIунну дуклай, ЕГЭ, ОГЭ лавайсса даражалий дулунсса хIарачат бара тIисса.
Шикку ихтилатру бунни ЧIяйннал школалул 11-мур ва 8-мур классирттал дуклаки оьрчIру Султан Сулаймановлул ва Максим Кьурбановлул.
Ихтилатирттая махъ хьунни балайрду, къавтIавуртту, конкурсру, викторинартту дусса тяхъасса вечер.
Ахирданий рирщунни дакIний личIансса суратру.
Имара Саидова
