Аьрасатнал Студентътурал кьинилул хьунийн ДР-лул культуралул министр Зарема Буттаева гьуртту хьунни Дагъусттаннал паччахIлугърал университетрал актовый залдануву хьхьичIунсса студентътуран наградартту дуллалисса шадлугърай. Министрнал барчаллагь увкунни ректорнахь ва студентътурахь республикалул магьирлугърал оьрмулуву дуллалисса чялишсса гьурттушиндарахлу.

«ДакIнийхтуну барчаллагь тIий бура личIи-личIисса культуралул проектирдаву гьуртту хъанай, жула авадансса ирс ябаврил ххуллий цала тикрал къашайсса чIу ва махъ ишла буллай бушиврухлу, так ца университетрал бакъассагу, щала республикалул пахрулун лайкьну дуклай бушиврухлу», – увкунни Зарема Буттаевал.
ДГУ-лул ректор Муртазяли Рабадановлул кIицI ларгунни махъсса шиннардийсса студентътурал ккаккияртту. Бувсунни 2025 шинал университетрал къавтIаврил ансамбль «Мой Дагестан» ххув хьушиву щалагу Аьрасатнал Студентътурал интлий, университетрал волейболистътурал мусил медальлу ларсун душиву щалагу Аьрасатнал Гъинтнил универсиадалий.

Студентътурал ккаккан дурунни балайрдал ва къавтIавурттал программа.
Грамортту ва барчаллагьрал чагъарду cтудентътуран буллунни ДР-лул Халкьуннал Мажлисрал Культуралул, жагьилтурал, спортрал ва туризмалул комитетрал хъунама Мурат Пайзуллаевлул, жагьилтурал иширттал министр Камил Саэдовлул, спортрал министр Сажид Сажидовлул ва цаймигу бусравсса хъамаллурал.

Зулайхат Тахакьаева