Тталаткьини Лакрал райондалий хьунни Аьрасатнал виваллил иширттал зузалтрал ва Участковый зузалтрал кьинилун хас дурсса мероприятие.

Низам дуруччай органнал зузалт барча бан бувкIун бия райондалул бакIчи Юсуп МахIаммадов, депутатътурал собраниялул хъунама Явсупи ХIамзаев ва ДР-лул Халкьуннал Мажлисрал депутат Марат Илиясов.

Мероприятие дайдирхьунни къуллугърал бурж биттур буллай жаннацIа хьусса низам дуруччай органнал зузалтран дацIан дурсса мемориалдануцI тIутIив дишаврия. Муния махъ дакIнин бивчунни агьалинал низам ва мюхчаншиву дуруччаврил ххуллий жанну дуллусса полициялул зазалт.
Гихуннайсса мероприятие хьунни актовый залдануву. РОВД-лул зузалт барча буллай, Юсуп МахIаммадовлул барчаллагь увкунни райондалий низам ва агьалинал мюхчаншиву дуруччаврил цIаний буллалисса захIматрахлу.

– Агьалинал дянив низам дуруччаву бакъасса, зу даингу хIадурну буру кумагран бучIан. Му зу цимилвагу исват бувссар. Мисалдаран буцин ­бюхъанссар сентябрьданий хьусса иш – зунттаву яттищал марххалттанивун кьувтIуну ливчIсса жула хIухчалт мугьлат бакъа ххассал бан лавгсса. Мури хIакьсса чувшиврул эбрат, – увкунни Юсуп МахIаммадовлул.

Райондалий низам дуруччаврил ххуллий дакI тIайлану бувсса захIматрахлу цаппарасса зузалтран дуллунни ХIурматрал грамотартту.
Низам дуруччай органнал зузалтрал пишалул социал агьамшиврий чIурчIав дуллай, ­Марат Илиясовлул увкунни: «Полицейскийнал даву – му анжагъ пиша бакъар, му – зу зуйва бивхьусса буржри. Зу цалчин букIлай буру инсаннан кумагран, дуручлай буру низам. Зул давриву аьркинну дур ларайсса пишакаршивруцIун, ссавур ва дакIнил кьуват. ЧIа тIий ура зун цIуллушиву, сагъ-саламатну зана шаваннав зу даврия зула кулпатирттал ялун!».
Низам дуруччай органнал зузалтрал барчаллагь увкунни райондалул бакIчинахь ва ­депутатнахь дурсса къулагъасрахлу.

Зулайхат Тахакьаева