Ларгсса ххуллункьини Лакрал театрдануву хьунни Аьрасатнал журналистикалул корифей, Аьрасатнал магьирлугърал бусравсса зузала, «Дагестан» ГТРК-лул хъунаманал хъиривчу Хавчаев Ссалам АьбдурахIиннул арснал кIира юбилейран – оьрмулул 75 ва творчествалул ххуллий 55 шин – хас дурсса шадлугъ.
Дайдирхьуна му Дагъусттаннал тележурналистика хьхьичIуннай даврил ххуллий Ссалам Хавчаевлул бивтсса захIматрал ххуллу ккаккан буллалисса видеосуратрая.
Ссалам Хавчаев барча ан бувкIун бия республикалул властьрал ва творчествалул интеллигенциялул вакилтал, дустал, гьалмахтал даврил уртакьтал ва артистътал.
Дагъусттан Республикалул культуралул министр Зарема Буттаевал кIицI лавгунни Дагъусттаннал телевидение хьхьичIуннай даврил ххуллий Ссалам Хавчаевлул бувсса захIмат. Ваналли итадаркьусса вай передачартту: «Ракурс», «Шаг к прекрасному», «На старт», «Как стать звездой», «ТОКС ведет поиск», «Планета культуры» ва чIярусса цаймигу.
Министрнал дакIнин бувтунни «Планета культуры» тIисса проектрай Ссалам Хавчаевлущал бивтсса творчествалул ххуллугу.
«Ина хъанахъиссара Дагъусттаннал телевидениялул ссавнийсса магьирлугърал планета, вила орбиталувун цимирагу никирал яла хьхьичIунсса ва гьунар ххисса магьирлугърал зузалт кIункIу буллай ивкIсса, агьамсса пикрирдая агьалинахь буслай ивкIсса, хьхьичIунсса творчествалул инсантураясса аьпа ябуллай ивкIсса, магьирлугърал оьрмулуву хъанахъимуних къулагъас дусса ва ми иширттаву агьамсса кIану бугьлай ивкIсса, Дагъусттаннал ляличIисса аслийшиврия буслай, медийныйсса политика сакин дуллай ивкIсса», – увкунни Зарема Буттаевал.
Дагъусттаннал Халкьуннал Мажлисрал хъунаманал хъиривчу Юрий Левицкийл ххюцIаллий ххюра шинал лажиндарай Дагъусттаннал телевидениялий Хавчаевлул дурцири передачарттаву ляличIинура кIицI ларгунни «ТОКС ведет поиск», ва передача сававну цикссагу инсантуран ятIа-тIар бакъасса цала гъанчу лявкъуну бушиврий чIурчIавгу дуллай.
«Ссалам Хавчаевлул захIматран билаятрал бивщуну бур лавайсса кьимат. Ва ур Аьрасатнал магьирлугърал бусравсса зузала, магьирлугърал аралувусса премиярттал лауреат, лайкь хьуну ур республикалул лараймур наградалун – «За заслуги перед РД» ордендалун», – увкунни Юрий Левицкийл.
Пишкаш дурунни ванан Халкьуннал Мажлисрал хъунаманал цIа чирчусса ссят.
«Ссалам АьбдурахIимович – ва анжагъ цала даврил пишакар акъар. Ва ур цала пикрирдайну, даврийну ватандалийн дакI тIайлашиврийну чIявуссаннавун гьавас бутлатисса инсан. ЗахIматри кьимат бищун Дагъусттаннал тележурналистика хьхьичIуннай даврил, магьирлугърал ирс ябаврил ххуллий ванал дакIнийхтуну бивхьусса захIматран», – увкунни Лакрал райондалул бакIчи Юсуп МахIаммадовлул.
КIицI лавгунни, Ссалам Хавчаевлул Лакку билаятрахсса ччаву, чялишсса гражданшиврул хIучча хIисаврайн лавсун ва чIярусса шиннардий бувсса захIматран кьимат бишлай, райондалул депутатътурал собраниялий маслихIат бувшиву ванан Лакрал райондалул бусравсса гражданиннал цIа дулун. БавхIунни Ссалам Хавчаевлул хъачIунттайх му цIа дуллушиву тасттикь буллалисса аьтIласрал ятIул лента.
Ссалам Хавчаев барча уллалисса ихтилатру ялагу бунни «Дагестан» ГТРК-лул хъунмур директор Луиза Аьлихановал, паччахIлугърал ишккакку Людмила Авшалумовал ва цайминналгу.
Дустал, гьалмахтал, уртакьтал дакIнин дичлай бия Ссалам Хавчаевлущал цачIу дузрайн дурксса проектирдая, цачIусса даврия, аьрххирдая. Цинявппа ца зумату кунма кIицI лаглай бия Ссалам Хавчаев ивкIшиву Дагъусттаннай ТОКС-рал штаб хIасул баврил бакIщаращуй ва хIакьинунингу ушиву му штабрай каялувшиву дуллай. Дагъусттаннал телевидениялий итадаркьусса «ТОКС ведет поиск» тIисса передачалун гьашину хъанай дур 55 шин.
Дагъусттаннай дур ТОКС-рал 122 кьюкьа. Республикалий цалчинминнувухсса ва хьхьичIунмунин ккаллисса МахIачкъала шагьрулул 35-мур школалул (Ленинкантливсса) ТОКСчиталгу бувкIун бия Ссалам Хавчаев барча ан.
Ссалам Хавчаевлул юбилейрал шадлугърай гьуртту хьунни Лакрал, Дагъусттаннал опералул театрдал артистътал, «Лезгинка» ансамбль.
Зулайхат Тахакьаева
