Халкьуннал цашиврул кьинилуцIун бавхIуну юнармейцы хъамалу бувкIунни Каспийскалийсса «Ястреб – Каспий» СОБР- ал (Дагъусттаннал Росгвардиялул управление) базалийн. Ва кьини шикку кьамул дурна Совет Союзрал Виричу, армиялул генерал В.Ф. Маргеловлул цIанийсса «Юный десантник» тIисса юнармейцынал гвардиялул профильный отряд.

Мероприятиялул лагрулий чIава десантниктурахь бувсунни Росгвардиялул зузалтрал къуллугърая ва къайгъурдая, хаснува кIицI лавгунни спецназрал къуллугърал ляличIишиву. ОьрчIан ккаккан дирхьуну дия отрядрал арсеналданувасса хасъсса техника ва ярагъ. Мукунна хъамаллуран ккаккан дурна беспилотный летательный аппаратрал оператортурал даву, подразделениялул зузалтрал тахсиркартал бугьлагьисса ва ширишилун бувгьуми ххассал буллалисса куц.

«Ястреб-Каспий» СОБР-ал командир, полициялул полковник Запир Алискантовлул бувсунни отрядрал тарихрая, спецподразделениялул хIаписартурал къучагъшивурттая. КIицI лавгунни отрядрал чIявуми зузалт паччахIлугърал наградарттан лайкь хьусса бушиву, мукьа зузалал Аьрасатнал Виричунал цIа ларсъшиву.
Хьунабакьаврил лагрулий интерактивный тирдануву юнармейцынал дянив хьунни битаврил бяст-ччал.

Запир Алискантовлул чIа увкунни хъамаллуран дуккавриву хьхьичIуннайшивуртту, дунни миннан бахшишру. «БивкIу бакъасса полкрал» региондалул отделениялул командир, Къизляр шагьрулул ва Къизлярдал райондалул юнармейцынал кIанттул отделениялул штабрал хъунама Эльдар Кьадиевлун буллунни спецподразделениялул ттугъ ва хъамакъабитулунсса медаль.

– Хъуннасса ххаришиву дур жущава цIанихсса отрядрачIан хъамалу бувкIун, вайннал къуллугърая, гьарица кьинисса къайгъурдая кIул хьун бюхъаврия. ОьрчIан хъунмасса хIаллай дакIний личIанссар ва хьунабакьаву. ДакIнийхтуну барчаллагьрай ура жунма кабакьу бувсса Къизлярдал райондалул бакIчи Аким Микировлуйн, жува ххарину кьамул бувсса, ялун нанисса ник Ватан ххирану тарбия шаву мурадрай хъуннасса даву дуллалисса СОБР-ал командирнайн ва аьралитурайн, – увкунни Эльдар Кьадиевлул.