Лимон цIу лагантIиссар
Кьакьлан, меж дикIлан диркIсса лимон дяркъусса щинаву чансса хIаллай дитарча, цIу лагантIиссар.
Ххи личIан мабару чимус
Ливхсса ххи ливчIсса чимус хъунмасса хIаллай ябуван къабучIиссар, мунил гьавалувусса заралмур, холодильникравусса цайми дукиялул сурсатирттавасса затру цивунна кIункIу дувайну тIий. Ишла бувну бачIи ливчIсса чимус цаппарасса хIаллай къазаралну яхьуншиврул, мунийх, кьувкьусса дазуйх, ччимур аьгъушиву дуккан ва холодильникравун букьан аьркинссар.
КъатIааьнсса кьанкь къаришланшиврул
Машиналул салондалуву, къатлуву, холодильникраву, шкаф-купераву, къуршилуву, сумкалуву, уссацIа, ахиргу, ларкьусса тIахIни-кIичIулуцIа тIааьн дакъасса кьанкь духьурча, му гьан дуван кьанкь дуний бишара сода (аццувун, аццул кьуцурттувун бивчуну), дишара активированный хъуручIул цаппарасса гургри ягу чяйлул пакетикру.
Ккурччун – кIирисса накI
КIюрххилссаннун ккурччун (каша) шахьлахьимунийн, ппиринж тIий, перловка тIий, щинаву шархьун махъ так ахирданий кIирисса накI дуртIуну хъинссар. Най бунува накIливу шахьларча, накIлил пурш лахъан бувну, ппиринж ва цаймигу щаллусса къама къаххуйну шахьайссар.
Ссиркагу, щингу
Ссирка ва щин ца лагрулий хIала дурну хьусса хьюмушиврул кухнилувусса ва щалвавагу къатлувусса микробру литIун буван кумаг бантIиссар, хаснура дукра дуллайна дикI, къур-чимус ва цамургу духъан ишла дувайсса тахталийми.
Лихъан мабитару витаминну
Дукра дуллалийни, кIункIурдул (ягълавлул) кьалакьи ларкьуну дакъахьурча, витаминнал сайки 20 процент бакъа хъанахъиссар, кьалакьи ларкьуний – так 5 процент.
Аьгъушиврул кIюласса къат
Банка тIивтIуну, томатрал паста ччяни зия къахьуншиврул ялтту мюршсса цIу бичин аьркинссар ягу ххяххиялул аьгъушиврул кIюласса къат дуван аьркинссар. БучIиссар томатрал пасталущалсса банкалул кьалакьуйх горчицалул къат дуккангу.
Аьгъушиврул ца-кIива кIунтI
Макарон ягу ппиринж шахьлахьийни, кувнницIун кув къалачIланшиврул, кIункIурдувун, щинавун, ца-кIива кIунтI ххяххиялул аьгъушиврул бувтIуну хъинссар.
Ца-кIива ккукку
ЦIубичулувусса цIу къахъатантIиссар, гивун ца-кIива ккукку ппиринжрал бичирча, хъатру ппиринжрал цивунна ласайссар.