Апрельданул 15-нний Сочилий, билаятрал яла хъунмур выставкартту дай майданнив, «Сириус» университетраву, зий байбивхьуссар щалвагу Аьрасатнал жилищный конгресс.
Ва 10 азарунниха ливчусса инсантал гьуртту хъанахъисса, мукьва гьантлийсса конгрессри. Аьрасатнавасса ва кьатIаллил билаятирттаясса вакилтурал хьхьичIун бувксса спикертураву бур машгьурсса политикталгу, хъуни-хъунисса строительный компаниярттал, недвижимостьрал агентствардал каялувчиталгу, банкирттал ва къатри дуллалисса, къатрал маша буллалисса идарарттал хъунимигу. Ва конгрессрай гьуртту хъанай бур 1-мур ЦIувкIратусса, МахIачкъалаливсса « ZABIDA» агентствалул хъунмур Забидат Аьбдуллаевагу. Кьуниясса шиннур ванил кIицI ларгсса агентство хIасул дурну зий. Ва бур юристгу, инвесторгу, Аьрасатнал хъуннасса идаралул, недвижимостьрал брокертурал, инвестортурал ва девелопертурал REAL INVEST CLUB сообществалул резидентгу.
«На, хъинну ялув бавцIуну, ттулла кIулшивуртту куртIгу, цIакьгу дуллан бикIара, недвижимостьрал дунияллий цIушиннардугу хъанай духьувкун. ИпотекалуцIун, инвестпроектирттацIун дархIусса законну ххуйну лахьхьиншиврул, даву дюхъан дуванну зуншиврул. Ва конгрессрай чIявусса, цIусса затру лавхьхьунни. Спикертал бур цIанихсса, щаллагу дунияллул недвижимостьрал рынокрай кIулсса. Курортирттал кIанттай хаснува мюнпат буссар машан ларсмуния. ЦIанакул «Ххюва хьхьири ва озеро Байкал» тIисса проект бартдигьавриха зий сукку хьуну бур, масалдаран. 2030 шиналнин хьхьирил зумардай 10 курорт бувансса мурад бусса бур. Каспий хьхьирил зуманивгу буван дакIний бур курорт. Аьрасатнал вице-премьер Дмитрий Чернышенкол баян бунни инвесторталгу хIадурну бушиву ва проектраха зун, хIукуматралгу кумаг бувантIишиву. Цаймигу дур агьалинан мюнпатсса проектру.
Нава кунма цIусса кIулшивурттал хъирив Сочилийн бувкIсса даврил уртакьталгу бакIрайн багьунни, яла-яла, ва жулла даврилмур майдангу гьарта-гьарза бувансса сантгур. Шикку цайми регионнаятусса даврил уртакьтуращал кIул хъанай буру, вайннаягу къакIулмур лахьлай, жунма кIулмур вайннангу лахьхьин буллай буру. ХIала-гьурттуну зузавумур кIивайннаннагур къулайсса», – увкунни Забидатлул «Илчилул» корреспондентнахь.
ПатIимат Рамазанова
